LlGC Llsgr. Peniarth 11 – tudalen 161r
Ystoriau Saint Greal
161r
Arglỽyd heb·y laỽnslot ỽrth walchmei. ny wys yn|y ỻys vn
chỽedyl y ỽrthyt. ac y mae ỻawer yn tybyeit. dy varỽ. Myn|vyng ̷
cret heb·y gỽalchmei mi a|af tu ac yno. kanys blin ỽyf a|ỻud+
edic. a|mi a|orffowyssaf yno yny del ewyỻys ym o newyd y geissy+
Y na ef a|vanagaỽd y laỽnslot pa [ aỽ anturyeu. ~
delỽ yr ymdangosses y greal idaỽ yn ỻys brenhin peleur.
a|pha|delỽ yr ebryvygaỽd ovyn beth a|arwydockaei. Arglỽyd heb+
y laỽnslot a|vuost di yn|wir yno. Bum myn vyng|cret heb·y
gwalchmei. ac am hynny ỻaỽen ỽyf a|thrist heuyt. ỻawen ỽyf
am welet y dwyỽolder yssyd yno. trist|ỽyf am ebryvygu o+
honaf yr|hynn a|daroed y|r brenhin vy rybudyaỽ amdanaỽ.
Arglỽyd heb·y laỽnslot y|mae arnaf|i chwant maỽr y vy+
net yno. Myn vyng|cret heb·y gỽalchmei iaỽn a|wney. ka+
nys ef a|m hanrydedwyt i yno yn vaỽr iaỽn. a mi a debygaf
vyng|goganu heuyt. Hyfryt yỽ gennyf|i eissyoes vot y mi+
lỽr a|oed weỻ no mi yn vym blaen. a|e oganu ynteu yn gymeint
a|minneu. Yna paỽb a gymerth kennat y gan y gilyd o·nadunt.
a|phob vn a|aeth o|e|fford heb ymdidan mỽy. Yma y|mae yr
ymdidan yn|tewi am walchmei. ac yn trossi ar laỽnslot.
E Ma* y mae y|kyvarwydyt yn menegi marchogaeth
o laỽnslot yny gyuaruu marchaỽc ac ef yn|y fforest
yn marchogaeth yn wrd ac a|brys maỽr arnaỽ ac yn aruaỽc
o|bop arueu. Ac yna gofyn a|oruc ef y laỽnslot o ba|le yd|oed
yn|dyuot. a vnben heb·y laỽnslot o lys arthur. Arglỽyd heb ef.
a|wdost di vn chwedyl y ỽrth marchaỽc a|tharyan werd ida ̷+
ỽ megys y meu inneu. Paham y|govynny di efo heb·y laỽns+
lot.
| « p 160v | p 161v » |