LlGC Llsgr. Peniarth 11 – tudalen 161v

Am y vot yn vraỽt ym heb ynteu. Pỽy y henw ef heb·y laỽns+

lot. Arglỽyd heb ynteu ef a|elwir gladonius. a oes y|th wlat

ti neb a|r kyffelyb honno namyn tydi. Nac oes heb y march  ̷+

aỽc. A|phaham y govynny di ef heb·y laỽnslot. am vot ere  ̷+

iỻ yn|y didref·tadu heb ynteu. a|gỽedy dỽyn casteỻ y gantha  ̷+

ỽ yr pan aeth ymeith o|r|wlat yd hanoed. a|mi a|wn y keiff ef

drachevyn drỽ·y y vilwryaeth da. Ae kystal milỽr efo a|hynny

heb·y laỽnslot. Kystal arglỽyd heb y marchaỽc. a goreu o  ̷ ̷+

ed ef o ynys y corsyd. Yr y vwyn ef heb·y laỽnslot diosc dy he  ̷+

lym. a|dangos ym dy wyneb. Mi a|wnaf yn|ỻawen heb y

marchaỽc. ac yna dangos y wyneb idaỽ. Myn vyng|cret   

heb·y laỽnslot nat ỽyt anhebic idaỽ. arglỽyd heb ynte  u

a wdost ditheu vn|chwedyl y ỽrthaỽ ef. Gỽnn heb·y laỽnslot

a mi a|dylyaf y dywedut ytt. ef a varchockaaỽd doe y·gyt

a|mi seith miỻtir. a|thebic iaỽn yttiỽ ytt. Jaỽn heb y mar+

ch·aỽc oed debygu pob vn y gilyd ohonam. kanys deu vroder

ym. Y·gyt a hynny y mae yn|y garu y wreic deckaf o ynys

y corsyd. ac nys|gỽeles yr ys|blỽydyn. kanys y mae yn ker+

det pob ỻe y enniỻ clot ac enỽ. ac yr duỽ arglỽyd dywet ym

pa|le y kaffaf y|welet. Yn|wir heb·y laỽnslot mi a|e|dywedaf

yn doluryus iaỽn. Paham heb y marchaỽc a|wnaethost di

chweith drỽc idaỽ ef. Efo a|wnaeth yrof|i gymeint ac y carỽ+

yf ef heb·y laỽnslot. ac etto vnben mi a|e|diolchaf idaỽ os gaỻaf

beth oc a|wnaeth yrof. a|mi a doethum hediỽ y bore y ỽrth y

gorff. ac a|vum ỽrth y gladu. Och arglỽyd. ae gỽir a|dywe+

dy di heb y marchaỽc. Gwir myn|duỽ yssywaeth heb·y laỽnslot.