LlGC Llsgr. Peniarth 12 rhan ii – tudalen 47r

kanny medylyant ỽy am eu marỽ. ac ỽrth hynny gỽaethaf

angeu yỽ vn pechadur. discipulus Ae drỽc y|r rei gỽirion na|chaff+

ont eu cladu yn|y kyssegyr. Magister Nac ef. yr hoỻ vyt yssyd dem+

yl y duỽ. kanys kyssegrỽyt o waet crist. ỽrth hynny beth

bynnac a wneler na|e gladu ym maes nac yng|koet nac

yng|gỽern. nac yn ỻe araỻ y byrer ỽynt. na|e hyssu o vỽ+

ystuileit nac o|bryfet ereiỻ. ỽynt a|achlessir yn arffet yr eglỽ+

ys yn wastat yr honn yssyd dros wyneb yr|hoỻ vyt. discipulus Ae da

udunt ỽynteu eu|cladu myỽn kyssegyr. Magister ỻawer ỻe a gysse+

grir o|r rei gỽirion a|glader yndunt. discipulus ae ỻes y|r rei a|vo yn

y poeneu amseraỽl eu cladu yn|y kyssegyr. Magister ỻes ỽrth wedi+

aỽ drostunt o eglỽys duỽ. a|dyuot eu|kereint a|e kedymdei+

thyon yno y wediaỽ drostunt ac uỽch eu penneu yn|yr

eglỽysseu ac yn|y mynnwennoed. discipulus Ae da y|r rei drỽc eu

cladu yn|y kyssegyr. Magister Ys mỽy drỽc udunt eu gỽasgu drỽy

gladedigaeth y·gyt a|r rei y gỽahenir ỽynt ym·peỻ y ỽrth+

unt drỽy y haedu ohonunt. ac ef a|darỻeir ry datclad o|r ky+

threulyeit lawer o|r kyfryỽ rei hynny. ac eu bỽrỽ o|r kyssegyr

ym·peỻ. discipulus Peỻ y|th wnel duỽ oreuaf athro y ỽrth bop drỽc.

a|christ a|th wnel yn gedymdeith o|e engylyon ef yn|y nef. Discipulus

C anys torret aneiryfedigyon benneu y sarff. ac y|mae

ereiỻ gỽedy ry dat·eni yn|y ỻe. a|geimat oleuni yr e+

glỽys kymer gledyf dy uonhedic dauaỽt a|thrycha goet y

govyn·neu yd ỽyf|i yng|kyueilyorn yndunt megys y gaỻỽ+

yf dyfot y|r rỽyduaes yng|gỽybodeu drỽydot ti. Magister Megys y

daỽ gỽrbỽys. ac aneiryf luossogrỽyd uarchogyon ganthaỽ

yn erbyn y wreicbỽys a|e dỽyn ganthaỽ gan ganueu a|ỻewe+

nyd.