LlGC Llsgr. Peniarth 18 – tudalen 58v
Brut y Tywysogion
58v
gỽyl luc evegylyỽyr* y tygaỽd holl tyỽyssogyon kymry
ffydlonder y dauid ap llywelyn ap ioruerth yn|ystrat|flur. Ac
yna y|duc ef y|gann y|vraỽt grufud. arỽystli. A|che+
ri. A chyueilaỽc. A maỽdỽy. A mochnant. A cha+
er einaỽn. Ac nyt adaỽd idaỽ dim namyn can+
tref lleyn e|hun. Ac yna y|lladaỽd maredud ap
madoc ap grufud maelaỽr. gruffut y|vraỽt. Ac yn|y
lle y|digyuoethes llywelyn ap ioruerth ef am hynny.
Y ulỽydyn racỽyneb y|bu varỽ maredud dall
ap yr arglỽyd rys. Ac y|cladỽyt yn|y ty gỽynn.
Ac yna y|bu varỽ escob caer ỽynt. Ac y|ganet
map y|henri vrenhin a|elỽit edỽard. Ac y|delis
dauid ap llywelyn grufud y|vraỽt gann torri aruoll ac ef.
Ac y carcharaỽd ef a|e vap yg|kruceith.
DEugein mlyned a|deu|cant a mil oed oet
crist pann uu varỽ llywelyn ap ioruerth tyỽy+
ssaỽc kymry gỽr a|oed anaỽd menegi y
ỽeithredoed. Ac y|cladỽyt yn aber conỽy ỽedy ky+
mryt abit y creuyd ymdanaỽ. Ac yn|y ol yntev
y|gỽeldychaỽd* dauid y|vap o|siỽan verch Jeuan
vrenhin y|vam. Mis mei racỽynep y daeth dauid
ap llywelyn a|barỽneit kymry gyt ac ef hyt yg|kaer
loyỽ y|ỽrhav y|henri vrenhin y|eỽythyr. Ac y gy+
mryt gantaỽ y|gyuoeth yn gyureithaỽl. Ac yna
yd anuones y|saesson ỽallter marscal a|llu gyt
ac ef y|gadarnhav aberteiui. Y ulỽydyn racỽy+
| « p 58r | p 59r » |