LlGC Llsgr. Peniarth 31 – tudalen 10r
Llyfr Blegywryd
10r
a uo kyuarwyd y myỽn kyfreith a tygho val hỽn+
nỽ na barno cam yn|y uywyt. Tri pheth a perth+
yn ỽrth vraỽtỽr; vn yỽ dillỽg kyfarcheu ỽrth
reit y brenhin. Eil yỽ datcanu a dosparth kyn+
hen neu y myỽn llys. Tryded yỽ; yr hyn a dos·partho
trỽy varn; y gadarnhau trỽy ỽystyl a braỽtlyf+
yr. ot ym·ỽystlir ac ef. neu os gouyn y brenhin
idaỽ heb ymỽystlaỽ. O deruyd rodi braỽt y dyn
Ac amheu y vraỽt o|r neb y barnỽyt idaỽ mal y
bo dir yr neb a|e barnaỽd y deturyt. A bot llawer
o ygneit ỽrth y barnu. A bot amrysson pỽy a dyly+
ho y deturyt A|e paỽb o·honunt a|e vn. kyfreith a
dyweit o|r byd ygnat llys ỽrth y barnu; ef a dyly
y deturyt. Ony byd hỽnnỽ a bot ygnat kymỽt;
hỽnnỽ bieu y deturyt. Ony byd hỽnnỽ; yr yg+
nat a|e datkanaỽd gynt a|e datuer yna o gyf+
reith. Sef achaỽs yỽ hynny; rac annuunaỽ
o|r ygneit ac am dywedut o gyfreith may naỽ+
uet dyn a gredir y tystolyaeth e hỽn yỽ braỽ+
dỽr am y vraỽt rỽng dỽy pleit. o|r byd amrys+
son y·rydunt. Ny ellir heuyt ymỽystlaỽ a neb
am varn onyt y neb a|e datkano. kanys gue+
dy datkanu barn; y may rodi gỽystyl yn|y er+
byn. Tri amheu braỽt yssyd; vn yỽ bot am+
| « p 9v | p 10v » |