LlGC Llsgr. Peniarth 32 (Y Llyfr Teg) – tudalen 59
Llyfr Iorwerth
59
a|dyly sefyỻ yn dylyedogyon y dat. Rei a|dyweit
o|r mynn y mab sefyỻ yn|y vechni; y mae uch
penn bed y|dat y|dyly y gỽat ar kyfreith. Nyni a|dy+
wedỽn na|dylyir; kanys y|doethon a|dyweit
nat erlit kyfreith. y byt hỽn dyn nac y|nef yd|el nac
y uffern. namyn yny el ef y ar y daear honn.
Sef achaỽs yỽ; kyt bo kyfreith. y·rỽng dyn a|e|gilyd ar
y daear honn. nyt oes kyfreith. y·rỽng diaỽl a|e gilyd.
nac y·rỽng egyl a|e gilyd. namyn yn ewyỻys duỽ.
ac ỽrth hynny dyn a|el y ar y daear honn; nyt
oes idaỽ ynteu kyfreith; namyn kytuot y neiỻ|rei o+
nadunt ỽy. Ac ỽrth hynny y mae iaỽn y uab
y mach marỽ hỽnnỽ gỽassanaethu kyfreith. tros y
dat. ual y gỽassanaethei y dat pei byỽ. ac o·ny
byd mab idaỽ; yr arglỽyd a|dyly sefyỻ yn ỻe mab
idaỽ. ac o|r byd reit y gymheỻ; ef a|dyly y gym+
heỻ ual y kymheỻei y mach pei byỽ. O deruyd. y|dyn
kymryt mach y gan araỻ ar beth. a chyn dy+
uot oet y dylyet marỽ y kynnogyn; y mach
a|dyly kymheỻ mab y kynnogyn megys y
kynnogyn pei byỽ. Ony byd mab idaỽ; safet
yr arglỽyd yn ỻe mab idaỽ a|thalet trostaỽ.
ac os gỽadu a vyn gỽadet ual y gỽadei y gỽr
yd aeth yn uab idaỽ yr y|da. kann bu weỻ ganthaỽ
vynet yn vab y|r gỽr racco yr da no bot yn ar ̷+
glỽyd. bit ynteu y|m·reint y|gỽr yd aeth yn vab
| « p 58 | p 60 » |