LlGC Llsgr. Peniarth 35 – tudalen 98v
Llyfr Iorwerth
98v
Tri anghyuarch gỽr yỽ nyt amgen
a|e uarch a|e arueu ar hyn a del idaỽ
o dayret y tir. Ar trydyd yr hyn a| del
idaỽ yn| y ỽynebwarth* y gan y wreic
am y o hegw*. Ny dyly ynteu ran+
nu yr un o|r tri pheth hynny a|e wreic
Tri aghyuarch gỽreic y thri
phrifei. A hynny ny dyly hitheu
y rannu ar gỽr; ~ ~ am ueichogi gỽreic.
Rei yssyd ar pedrus am ueichogi
gỽreic o|r llygrir pa beth a| dyly+
ir ymdanaỽ a|e vynebwarth* a|e ga+
lanas. y kyfreith. a| dyweit panyỽ gala+
nas a| dylyir ymdanaỽ. Sef achos yỽ
yn| y tri mis kyntaf y byd gwyn ef.
Ac yna y byd trayan galanas arnaỽ.
yn| yr eil tri mis. y byd rud ef. Ac y
byd deuparth galanas arnaỽ. Ac
yn| y tri mis diwethaf y byd kyflaỽn
ynteu o aelodeu ac eneit. Ac y byd
galanas gỽbyl arnaỽ. Rei a| dywe+
it nat iaỽnach talu galanas gỽr ym+
danaỽ ef noc un gỽreic Cany wys
beth yỽ ef a|e gỽr a|e gỽreic. y kyfreith.
a| dyweit bot yn iaỽnach yn ol y peth
pen
| « p 98r | p 99r » |