LlGC Llsgr. Peniarth 46 – tudalen 186
Brut y Brenhinoedd
186
maỽrweirthaỽc. canys ym·pob kyuranc.
y bydei orchyuygaỽdyr drỽydunt. ac
y·uelly beunyd eissyoes yd achuanecaei
heingyst y lu trỽy dỽyll a brat ganedic
ganthaỽ. a guedy adnabot hynny o|r
brytannyeit. daly ouyn a wnaethant.
ac erchi y|r brenhin eu gyrru o teyrnas
enys prydein. cany wedei y gristonogyon ked ̷+
ymdeithocau a phaganyeit. nac ymgymyscu
ac ỽynt. canys kyureith a dedyf cristonnogy ̷+
aeth a|e guahardei. ac y·gyt a hynny. kyme ̷+
int oed eu niuer ac nat oed haỽd adnabot
pỽy a uei cristyaỽn pỽy a uei pagan. ac y+
gyt a hynny seint Garmaỽn a orchymyn+
assei udunt. dihol y paganyeit saesson oc eu
plith. ac eissyoes sef a wnaeth Gortheyrn o gar+
yat y wreic a|r saesson ysgaelussaỽ y brytan+
nyeit. a guedy guelet hynny o|r brytannyeit
sef a wnaethant ỽynteu ymadaỽ a Gortheyrn.
a chymryt Guertheuyr uendigeit y uab ynteu. a|e urdaỽ
yn urenhin arnadunt. a dechreu ymlad a|r saesson. a
guneuthur aeruaeu maỽr creulaỽn
onadunt. megys yd oed da et cetera
| « p 185 | p 187 » |