LlGC Llsgr. Peniarth 46 – tudalen 191
Brut y Brenhinoedd
191
gỽedy datkannu hynny y|r brenhin ro+
di tagnef udunt a|oruc. ac erchi y|r
kyỽdaỽdỽyr dyuot duỽ kalan mei. a|r saesson
heuyt hyt y|lle a|elỽir maes kymry
y ỽneuthur tagneued yrydunt. ac ar+
uer yna o|neỽyd o|e tỽyll a|e brat. a|ỽn+
aeth hengist. ac erchi y bop un o|e get+
ymdeithon dỽyn kyllell hir gantaỽ
y|myỽn y hossaneu gyt a|e haesgeireu.
ac yna pann uei dibryderaf gantunt
yn gỽneuthur y dadleu. rodi arỽyd o|hen+
gist. Sef oed yr arỽyd. Nymyd yỽr sex+
ys. a|phann dyỽettei ef yr arỽyd hỽn+
nỽ. kymryt o bop un y|gyllell a|llad y
bryttỽn nessaf idaỽ. a|r dyd gossodedic
oed yrydunt. ỽynt a deuthant baỽp
yn|y gyueir y|r lle hỽnnỽ. a gỽedy y
dyuot. a gỽelet o|hengist yr aỽr a|uu
da gantaỽ. ef a|dyỽat yn digaỽn y|uch+
et. Nymyd oỽr sexys. Sef oed hynny
yg|kymraec. kymerỽch ych kyllyll.
| « p 190 | p 192 » |