LlGC Llsgr. Peniarth 46 – tudalen 48
Brut y Brenhinoedd
48
rỽ bleidud y|dyrcheuit llyr y|vab yn vren+
hin. a thri vgein mlyned y gỽledychỽys
ef yn ỽraỽl. ac yd adeilỽys dinas ar af+
on soram. ac y gelỽis o|e enỽ ef caer lyr.
ac yn saesnec y gelỽir leiscestyr. ac ny
bu idaỽ un mab namyn teir merchet.
a uu idaỽ. Sef y gelỽit hỽy. Goronilla.
Ragaỽ. Gordeilla. a|diruaỽr veint y ca ̷ ̷+
rei y tat ỽy. a mỽyhaf yn da y carei ef y
Jeuhaf. Gordeilla oed honno. a|phann yt+
toed yn llithraỽ parth a|heneint. Medyly+
aỽ a|ỽnaeth pa ỽed yd adaỽhei y|gyuoeth
gỽedy ef o|e verchet. Sef a|ỽnaeth proui
pỽy vỽyhaf a|e carei ef o|e verchet ỽrth
rodi idi y rann uỽyhaf o|r kyuoeth gann
ỽr. a galỽ a|ỽnaeth y|verch hynaf attaỽ.
Goronilla. a gouyn idi pa|veint y|carei
hi ef. a|thygu a|oruc hithev y|r|nef a|r
dayar. bot yn uỽy y carei hi euo no|e he+
neit e|hun. a chredu a|ỽnaeth ef y hynny
a dyỽedut ỽrthi kann carei hi euo yn ̷
| « p 47 | p 49 » |