LlB Llsgr. Cotton Cleopatra B V rhan i – tudalen 75r
Brut y Brenhinoedd
75r
esmwithra a digrifrwch*. Ac yno y dothoed gwrleis iarll
kernyw ac eigyr verch amlawd wledic y wreic briawt. ac
nyd oed yn ynys brydein na gwreic na morwyn kyn dec+
ket a hi. Sef a oruc vthyr yna pan y gwelas enynhv o|e
chariat. ac hep allel argel ar hynny. ac na vynhei vod
hebdi yr dim. ac yn diargel anvon idi anregion. a gwi+
rodeu gwin mynych. a geirieu ymwys. yny adnabu y
gwr hynny. Ar nos honno pan aeth pawb y gysgu; wynt
a aethant yw lletty. ac yno y menegis hi yw gwr holl ky+
vrinacheu a|dywetdassei y brenhin wrthi. Ac yna llidiaw
a oruc gwrlleis; ac o gyt·kynghor yd aethant y nos hon+
no y tu a chernyw heb cannyat y brenhin. A gwedy me+
negi yr brenhin hynny; llidiaw a oruc. ac anvon ken+
nat yn|y ol; y erchi idaw dyuot drachevyn. canys ssar+
haet vaur oed idaw adaw y llys heb ganyat. Ac nyd
ymchwelei. Ac anvon yr eil gennat. ac ny deuwei. Ac
anvon a oruc y drydet gennat gan dynghu; ony deu+
wei. y digyuoythit ef o dan a hayarn. Ac nyt ymchwe+
lawd yr hynny. Ac yn diannot kynullaw llu a oruc
vthyr; a mynet am ben kernyw. a dechreu llad a llosgi.
Sef a oruc gorleis yna canys nat oed o niver ganthaw
val y gallei ymherbynnieit ac ef; cadarnhau deu gas+
tell idaw a rodi y wreic yn|y castell cadarnhaf ssef oed
honno castell dindagol ar lan y mor. Ac ynteu e|hvn
a aeth hyt yng|kastell dimlot. rac ev kyuarssanghu
y·gyd wynt. A gwedy caffayl o|r brenhin manac pa
le yd oed gwrleis; kyrchu yno a oruc. ef a|y lu. ac ymlat
ar castell yn llidiawc creulon. tri·dieu ar vntu. ac|ny
digrynhoes dim idaw yr hynny. namyn colli y wyr
| « p 74v | p 75v » |