LlB Llsgr. Cotton Titus D IX – tudalen 57r
Llyfr Blegywryd
57r
deir ar|hugeint yg|gobyr diffryt drostaỽ
a|telir. a phedeir keinnaỽc yg|kyueir pob
kymhỽt o|r y kerdaỽ drostaỽ. Ot a y|vren+
hinaeth arall; pedeir ar|hugeint yn|llaỽ
a|geiff y|neb a|e|rydhao. ac o|hynny y|tra+
yan a|gynneil gantaỽ. a|r deuparth a ̷
geiff perchennaỽc y|tir. Y neb a veich+
occo gỽreic caeth y|ỽr arall; paret wreic
arall yn|lle honno y|wassannaethu hy ̷ ̷+
ny agho. a gỽedy a·gho maget y|tat yr
etiued. ac o|r byd marỽ y|gaeth honno y
ar yr etiued hỽnnỽ. talet y|neb a|e|beich+
oges y gỽerth o|e|harglỽyd. Y neb a|gy+
ttyo a|gỽreic gaeth heb gannyat y|har+
glỽyd. talet deudec keinnaỽc dros bop
kyt. Pob ryỽ dyn eithyr alltut. a vyd
dyrchauel ar|y|werth a|e sarhaet. LLe y
talher vgeineu aryant gyt a|gỽarthec.
yn lle ardyrchauel y kynnhelir. Pedeir
bu a|phetuarvgeint aryant a|telir dros
sarhaet teuluwr brenhin brenhin. Teir
bu a|telir yn sarhaet teuluỽr breyr. nyt
amgen. tri|buhyn talbeinc. Vn werth
vyd y|neb a|rodher yg|gỽystyl. a|r|neb
y|rodher drostaỽ. O|R kymer gỽr wreic
o|rod kenedyl. ac os gat kynn penn y|se+
| « p 56v | p 57v » |