Llsgr. Caerdydd 1.362 (Hafod 1) – tudalen 76r
Brut y Brenhinoedd
76r
gaer. medylyaỽ a oruc dỽyn kyrch nos am pen
arthur a|e lu. Ac nyt amgelỽys hynny rac arthur
Sef a oruc ynteu anuon cadỽr tewyssaỽc kernyỽ
a wechant marchaỽc gantaỽ a their|mil o pedyt
y rac vlaenu y fford y tybygynt y dyuot. a gỽe+
dy kaffel o cadỽr gỽybot y fford ỽynt dỽyn kyrch
a oruc am eu pen ac eu gỽascaru a|e kymell. ar ffo
A diruaỽr tristyt a gymyrth baldỽlf ỽrth na allỽ+
ys gellỽg y uraỽt o|r gỽachae* yd oed yndaỽ. A me+
dylyaỽ a wnaeth pỽed y gallei gaffel ymdidan a|e
vraỽt. kans ef a tybygei y keffynt holl rydit a
gỽaret pei keffynt furyf y gytystrywyaỽ peth a
wnelynt. a gỽedy nat oed fford amgen. sef a|wnaeth
eillaỽ y wallt. a gỽneuthur diwyl erestyn arnaỽ.
A chymryt tel·yn yn|y laỽ a cherdet trỽy bebylleu
arthur gan ym·dangos ym erestyn. A gỽedy na thy+
bygei neb ỽrthaỽ y vot yn tỽyllỽr mal yd oed. Sef
a oruc dynessau parth ar|gaer dan ganu telyn. A gỽe+
dy y adnabot o|r rei gỽarchaedic. sef a wnaethant
estynnu raffeu idaỽ ac|ỽrth y raffeu y tynnu y myỽn.
A gỽedy gỽelet o·honaỽ y vraỽt mynet dỽylyaỽ
mynỽgyl ac ef a oruc. A gỽedy medylyaỽ o·nadunt
bỽed y gellynt ymrythau o·dyno nachaf y kenhadeu
yn dyuot o germ·ania a wechan|llog gantunt yn|lla+
ỽn o varchogyon aruaỽc. A cheldric yn tywyssaỽc
arnadunt a discyn yr alban y tir. A gỽedy clybot
o arthur hynny. sef y kauas yn|y gyghor nat
eistedei ỽrth y|gaer hỽy no hynny rac pedruster
ymlad a chynulleittua gymeint a honno. o delynt
| « p 75v | p 76v » |