Llsgr. Caerdydd 1.363 (Hafod 2) – tudalen 163r
Brut y Brenhinoedd
163r
er rey henny hyt tra edoed rỽueynnyaỽl ỽe+
dyant en eỽ medỽ a talassant teyrnget
er amerodron a wuant kyn no mynheỽ.
A chanys o|r ỽeynt sarahedeỽ henny e barnỽs
sened rỽueyn mynnỽ yaỽn y genyt ty. wrth
henny mynnhev a gossodaf terỽyn ytty er aỽ+
st kyntaf essyd en dyvot. dyỽot o·honaỽt tyth+
eỽ hyt en rvueyn y gwneythỽr yaỽn o|r sarahe+
deỽ henny. ac y dyodef y vravt a ỽarnho sened rỽ+
ueyn arnat. Ac o·ny devy ty e velly myfy a kyr+
chaf de wladoed ty a megys yr ranno y cledyfeỽ
my a|e kymellaf ac a lafỽryaf o|y dwyn trache+
vyn. wrth sened rỽueyn.
AG gwedy datkanỽ e llythyr hỽnnỽ rac bron
arthỽr ar brenhyned ar tewyssogyon a o+
edynt y gyt ac ef. ef a aeth ac wynt hyt em meỽn
twr e kewry y kymryt eỽ kyghor pa peth a gw+
nelhynt en erbyn y kymenedyweỽ henny. Ac ỽal
ed oedynt en dechreỽ eskynnỽ e gradeỽ. kadwr y+
arll kernyw megys gwr llawen y ỽedỽl a dywaỽt er
amadraỽd hwnn. hyt|hynn ovyn ar ry|fỽ arnaf y rac
gorỽot o lesked ar e brytanyeyt o hyr hedvch. a cholly
| « p 162v | p 163v » |