LlGC Llsgr. Llanstephan 27 (Llyfr Coch Talgarth) – tudalen 126r
Ystoria Titus
126r
deng|ieith a|thrugeint o amryw yo* ieithoed ar hyt y byt
ac yd oed yna y|n gỽlat ni gỽreic a elwit veronic. ac a|oed
yn|diodef heint yr ys deudeng mlyned. ac a|gafas iechyt y
ganthaỽ. ac o|e garyat ynteu y kymerth y wreic honno
y myỽn ỻiein drych y wyneb ef. ac weithyon a|del o|dyny+
on a heint arnunt y adoli y delỽ honno a|gaffant iechyt.
Ryuedu hynny a|oruc titus pan y kigleu. a dywedut. Gỽ+
ae ti tiber amheraỽdyr. gỽae di dy|uot yn|dranghedic o
glafri. ac yn damgylchynnedic o deruysc. pan anuones y
ryỽ dywyssogyon hynny y|th wlat ti a ladassant uab duỽ.
rydhaaỽr yn|heneideu ni. Mi a|dywedaf yti eissoes yn wir
pei bydynt y tywyssogyon hynny rac vy|m·ronn i mi a|lad+
ỽn penneu rei o·nadunt ac a|grogỽn ereiỻ o|r rei a|grogas+
sant yr|hỽnn ny bu deilỽng y|m ỻygeit i y welet. Pan dar+
uu hagen y titus dywedut hynny o ymadraỽd y dygỽydaỽd
y crangk o|e wyneb. ac y bu kyn iachet y le a chynn y vot y+
no pan vu iachaf eiryoet a theckaf. ac o|hyt y benn y dywa+
ỽt titus. vyn|tywyssaỽc i a|m duỽ a|m brenhin. ny weleis i
dydi eiryoet. ac eissoes kann credeis ytt yd ỽyf yn|holliach.
pam* ym dyuot y daear dy anedigaeth di ual y kaffỽyf
vudugolyaeth o|th elynyon. ac y gỽasgarỽyf ỽynt o|r daear
honno hyt na bo yno a bisso ar y paret o·honunt. Ac ody+
na y dywaỽt ỽrth nathan. Pa ryỽ arwyd a rodes ef y ffyd+
lonyon a grettei idaỽ. Eu bedydyaỽ y myỽn dỽfyr heb·y
nathan. Mi a|gredaf heb·y titus yn|yr|hỽnn a m goruc i
yn iach. a|bedydy·a ditheu vi yn|y mod y gorchymynnaỽd
ef. ac erchi y nathan y vedydyaỽ yn enỽ y drindaỽt. Pan
| « p 125v | p 126v » |