LlGC Llsgr. 3035 (Mostyn 116) – tudalen 144r
Brut y Tywysogion
144r
mlyned. oed. oet. crist. pan doeth jgmỽnd y|ynys von. Ac y kynhalaỽd maes
ros meilon. ac yna y|ỻas mab meruyn y|gan y|genedyl. ac y|bu
varỽ ỻywarch vab hennyth. ac y|ỻas pen ryderch vab hennyth
duỽ gỽyl baỽl. ac y bu weith dinneirth. yn yr hỽn y ỻas maelaỽc
cam vab peredur. ac yna y dileỽẏt mẏnẏỽ. ac y|bu varỽ gorchỽẏl
escob. ac y bu varỽ corruaỽc brenhin. ac escob hoỻ iwerdon. a
gỽr maỽr y|grefyd a|e gardaỽt. Mab y culenan a las o|e uod y
myỽn brỽẏdẏr ac y bu varỽ keruaỻt vab muregan brenhin
langesẏ o keugant diwed. ac y bu varỽ asser archescob ynys
brydein. a chadeỻ vab rodri. Deg mlyned. a naỽ cant. oed. oet. crist. pan
deuth other y ynẏs brydein. ac y|bu varỽ an·araỽt vab rodri
brenhin y|bryttanyeit. ac y|diffeithỽẏt Jwerdon a mon y gan bobyl
dulẏn. ac y bu varỽ edelflet vrenhines. ac y ỻas clydaỽc vab
cadeỻ y gan veuruc y vraỽt. ac y bu varỽ nercu escob. ac ẏ|bu
weith y dinas newyd. Ugein mlyned. a naỽ cant. oed. oet. crist. pan aeth
howel da vrenhin vab kadeỻ y rufein. ac y bu varỽ elen. ~
Deg mlyned. ar|hugein a naỽcant. oed. oet. crist. pan las gruffud ab ywein
y gan wyr keredigẏaỽn. ac y|bu ryfel brun. ac y bu varỽ hen+
nyrth vab clydaỽc a meuryc y vraỽt. ac y bu varỽ edelstan
brenhin y|saeson. Deugein mlẏned a naỽ cant. oed. oet. crist. pan vu
varỽ abloyc vrenhin. a chadeỻ vab arthuael a|wenỽynỽyt.
ac jdwal vab rodri ac elised y vraỽt a|las y|gan y|saeson. ac
y bu varỽ lỽmbert escob mynyỽ ac vssa vab ỻaur. a|morcleis
| « p 143v | p 144v » |