LlGC Llsgr. 3035 (Mostyn 116) – tudalen 156r
Brut y Tywysogion
156r
a|phan gigleu ricart escob ỻundein hyny. y gỽr a oed yna
ystiwart y henri vrenhin yn|amỽythic medylyaỽ a|oruc dial
ar ywein sarhaet gerald ystiwart. a galỽ attaỽ a|wnaeth
Jthel a Madaỽc meibon ridit ap bledyn a dywedut ỽrth+
vnt val hyn a vynỽch|wichi regi bod y henri vrenhin a|chaf+
fel y|garyat a|e gytymdeithas yn dragywydaỽl ac ef a|ch
maỽrha yn benach no neb o|ch|kyttirogyon ac a gyghor+
uynha ỽrthyỽch y|ch|kyt·teruynwyr o|ch hoỻ genedyl. ac
atteb a|wnaethant mynỽn heb ỽynt. eỽch chỽitheu heb
ef a delỽch ewein ap kadỽgaỽn os geỻỽch. ac ony|s geỻỽch
gỽrthledỽch o|r wlat ef a|e tat canys ef a|wnaeth cam a|sar+
haet yn erbyn henri vrenhin a|diruaỽr goỻet y|erald ysti+
wart y|wahan·redaỽl gyfeiỻt ef am y wreic a|e blant a|e gasteỻ
a|e yspeil a|n* anreith a|minheu a|rodaf gyt a chỽi fydlonyon
gytnymdeithon. Nyt amgen ỻywarch ap trahayarn y gỽr
a ladaỽd ywein y vrodyr. ac vchtryt ap etwin. ac ỽynteu
gỽedy credu yr edewidyon hynẏ ac a gynuỻassant lu
ac yd aethant ẏgẏt ac y|kyrchassant y|wlat. ac uchtrut
a anuones y|r wlat kenadeu y venegi y|r giỽdaỽt pỽy|byn+
ac a giỻyei attaỽ ef y kaffei amdiffyn. a rei a|kiỻassant
attaỽ ef ereiỻ y|arỽystli ereiỻ y vaelenyd ereiỻ y ystrat
tywi a|r ran vỽyaf y|dyfet yd|aethant y|r ỻe yd oed ger+
ald yn vedyanus. a phan yttoed ef yn mynnu eu di+
ua ỽynt ef a|damweinaỽd dyuot gỽaỻter uchel·uaer
kaer loyỽ y gỽr a|orchymynasse y|brenhin idaỽ ỻỽodraeth
ac amdiffyn ỻoegyr hyt yg|kaer vyrdin a|phan gigleu
hyny eu hamdiffyn a|oruc. a|rei o·nadunt a kiỻaỽd y a+
r·ỽystli. ac y kehyrdaỽd gỽyr maelenyd ac ỽynt ac y|ỻa+
| « p 155v | p 156v » |