LlGC Llsgr. 3035 (Mostyn 116) – tudalen 25r
Brut y Brenhinoedd
25r
o|r diwed y|deuei ar vlaenwed gorchuchelder anry+
ded. Ac ny thỽyỻỽẏs eu dewindabaeth ỽynt. kanys
doeth eu dewindabaeth. ac yna gỽedy dyuot oet
y|r vorỽyn y eskor. ar y|theuydle y bu varỽ. ac veỻy
y|ỻadaỽd y vam a|r mab a|rodet ar|uaeth ac y dodet
bruttus arnaỽ. A gỽedẏ meithrin ẏ|mab a|e vot yn
bymthegmlỽyd. diwarnaỽt yd oed y gỽas yn kan+
lyn y|dat yn hely. ac val yd oedynt y·veỻy nachaf
karỽ yn kerdet heibaỽ sef a|oruc brutus anelu bỽa
a geỻỽg saeth. ac yn keissaỽ ỻad y karỽ y gỽant y
dat a|r|saeth y|adan y vron ac y bu varỽ. ac y·veỻy
y|ỻadaỽd y dat a gỽedẏ marỽ y dat o|r ergyt hỽnỽ
y|deholes gỽyr yr eidal vrutus. Kanyt oed teilỽg
gantunt kymrẏt yn vrenhin arnadunt gỽr a|wnelei
kyflauan kymeint a ỻad y vam a|e dat a gỽedy y|dẏ+
hol yd aeth ynteu hyt yg|goroec. ac y gỽelas gỽely+
gord o|etiued elenus vab priaf yg|keithiwet y dan
bandrassus vrenhin groec. Pyr vab achil a|dugas+
sei y|genedyl hono gantaỽ gỽedẏ distryỽ tro y|dial
y|dat ac a|e gỽarchayassei yg keithiwet ỽynt yn
gyhyt a|hẏnẏ o amser ac yna gỽedy adnabot o vru+
tus y|genedyl tri·gyaỽ a|wnaeth y·gyt ac ỽynt ac
yn|y ỻe gỽedy keneuinaỽ bruttus ac ymadnabot
a|phaỽb o·honunt kymeint vu y|daỽn yn eu plith
yny oed garedic a|chymeredic y|gan y brenhined
a|r tywyssogyon a hyny a|oed idaỽ o|e pryt a|e deỽ+
red a|e haelder a|e dayoni a|e vilỽryaeth a|e glot
a sef achaỽs oed hẏnẏ doethaf oed ym|plith y do+
ethon deỽraf ym|plith y rei ymladgar ac ygyt a
hẏnẏ pa beth bynac a|damweinei idaỽ nac eur
| « p 24v | p 25v » |