LlGC Llsgr. 3036 (Mostyn 117) – tudalen 224
Brut y Brenhinoedd
224
ygỽarthaf y pen hyt yr emenhyd. A llef a dodes
yr| antyghetuenaỽl. A syrthyaỽ megys derwen
vaỽr pan syrthei gan wynt maỽr o|e gureid gan
diruaỽr tỽrỽf. A sef a| wnaeth arthur chwerthin.
Ac erchi y vedwyr llad y pen a|e rodi ar yr yswein+
eit ỽrth y| dỽyn ym|plith y llu o|e dangos yn enryue+
daỽt. Ac yna y| dywaỽt arthur na ry gaỽssei ef eiroet
yr eil gỽr kyn deỽret a| hỽnnỽ. guedy ymlad o·honaỽ
a Ricca gaỽr ymynyd eryri. hỽnnỽ a|e kymhellas+
sei y ymlad ac ef. o achaỽs ry| wneuthur o·honaỽ
pilis idaỽ o varueu brenhined. Ac ỽrth hynny erchi
y arthur e| hunan bligaỽ y varyf yn llỽyr a|e hanuon
idaỽ. Ac ỽrth uot arthur yn penhaf o|r brenhined.
ỽrth hynny yn enryded y arthur y gadyssei ynteu
lle baryf arthur yn vchaf ar y pilis. Ac ony bligei
arthur y varyf yn vfyd. erchi idaỽ dyuot y ymlad
ac ef. Ar vn a orffei onadunt. kymerhei y pilis a
baryf y llall. A guedy ymlad o·nadunt. y| goruu ar+
thur a dỽyn y varyf a|e pilis y arnaỽ a|e lad. A guedy
hỽnnỽ ny ry| gaỽssei arthur vn gỽr kyn gadarnet
ar| llall. Ac odyna y| doethant a phen y kaỽr gant+
unt yn enryuedaỽt yr llu. A phaỽb o|r a|e guelei
yn moli y| gỽr a|e rydhaassei y wlat o|r ryỽ ormes
honno. Ac eissoes tristau a oruc hywel yn vaỽr
am agheu y nith. Ac erchi gỽneuthur eglỽys vch
pen y bed yn| y mynyd. Ac o enỽ y uorỽyn y| gelwir
y| lle hỽnnỽ etwa bed elen.
| « p 223 | p 225 » |