LlGC Llsgr. Peniarth 11 – tudalen 133r
Ystoriau Saint Greal
133r
hynny ef a|gymerth tri thameit o vara a gỽin. Ac odyna
ef a|vynnaỽd y|r pump marchaỽc a|deuynt ỽy yng|kyfyl y
tỽrneimant. awn heb ỽynteu ot ey di. af myn vyng|cret
heb ef. Ac yna kymryt kennat y wreic a|r verch a|oruc gỽ+
alchmei. a|cherdet racdaỽ a|oruc ef a|r pump marchaỽc y+
gyt ac ef. a ỻawenyd maỽr ganthunt am vot gỽalchmei
yn dyuot y|r gynnuỻeitua gyt ac ỽynt. Ac yna gadaỽ y cas+
teỻ a|wnaethant a|dyuot y|r fforest. ac ny welsei walchmei ei+
ryoet fforest degach no hi. ac yn gymeint ac na aỻei amkan
arnei. a|gỽeirglodyeu tec gan y hystlys. ac ym perued y
gỽeirglodyeu y gỽelei yr aniueilyeit gỽyỻtyon o bop amryỽ
aniueil. wedy dyuot o|r fforest. Arglỽyd heb y marchogyon
ỽrth walchmei. weldy|racko y glynn a|r fforestyd a|r|gỽeirglo+
dyeu a|ducpỽyt y gan yn harglỽydes ni a|e merch. ac y·gyt
a|hynny ef a|ducpỽyt seith gasteỻ o|r rei goreu o gymry ~
Cam a|wnaethant heb·y gỽalchmei. a|phechaỽt maỽr. Yna
ỽynt a|gerdassant racdunt yny welynt yr arỽydon a|r tary+
aneu. ac ỽynt a|welynt baỽp yn mynet ar eu meirch. ac
ỽynt a|welynt tynnu pebyỻeu o bop parth. Yna gỽalchmei
a|safaỽd dan vric prenn ef a|r|pump marchaỽc. ac ỽynt a
welynt y toruoed yn dyuot o bop parth. Yna ef a|dangosset
y walchmei arglỽyd y corsyd. a braỽt y marchaỽc a|r|daryan
goch. yr hỽnn a|elwit kaos goch. Yr aỽr y dechreuwyt y tỽrnei+
mant. gỽalchmei a doeth tu ac yno. a|r pum marchaỽc gyt
ac ef. Ac yna gỽalchmei a doeth ac a|vỽryaỽd vn ar hynt y|r
ỻaỽr. ac ueỻy y gorugant ỽynteu bop vn o|r pump marchaỽc.
| « p 132v | p 133v » |