LlGC Llsgr. Peniarth 11 – tudalen 223v

y ỻadyssaỽch. A|r casteỻ tlaỽt a weleist di. na|r dinas yma. ny

buassei gyflaỽn o dynyon vyth pany bei dy gywirdeb di. ac ef

a doeth yma o|th vlaen|di vgein marchaỽc ual y doethost ditheu.

ac ny bu onadunt yr vn ny ladei yni ae braỽt ae ewythyr ae

kevynderỽ. ac ef a|uv reit y baỽp dyngu ual y tyngeist ditheu.

a|phaỽb a ffaelyaỽd ac a|dyngassant a·nudon rac ovyn angeu.

a|phei ffaelyassut titheu ni a|goỻassem y|dinas hỽnn vyth ~

heb obeith o|e gael drachevyn. Yna y morynyon a|r marchaỽc

urdaỽl. a|dugassant laỽnslot drỽy lewenyd maỽr y|r neuad. Ac

yna diosc y arueu a|wnaethpỽyt. a|gỽisgaỽ glan diỻat ymdan+

aỽ. ac ef a|glywei y ỻewenyd mỽyaf yn ỻawer o leoed yn|y dinas

ac odieithyr y|dinas. Arglỽyd heb·yr vn o|r morynyon ti a

gly* veint y ỻewenyd yssyd o achaỽs dy dyuotyat ti yma. kanys

y barỽnyeit a phorthmyn y|dref yssyd yn dyuot y|r dinas y

drigyaỽ. ac vynt a|wdant dy|uot ˄ti yma. Laỽnslot yna a gyuo+

des y vyny. ac a|o·gỽydaỽd ar vn o ffenestri y neuad. ac a|edrych+

aỽd aỻan. ac a weles y dref yn ỻenwi o|r tylỽyth teckaf o|r a

welsei neb eiryoet. ac offeiryeit a|gỽyr crevyd o|e blaen yn

dywedut molyanneu y duỽ am vot udunt ry·dit y|dyuot

dra e|keuyn. Laỽnslot a vu anrydedus yn|y casteỻ hỽnnỽ

ac yn|y|dinas. a|r marchogyon a|e gỽassanaethassant yn ga+

redic. Yma y|mae yr ymdidan yn|tewi am laỽnslot. ac yn tra+

ethu am arthur a|gỽalchmei. ~ ~ ~  

E Ma* y|mae yr ystorya yn traethu vot arthur a gỽ+

alchmei yn marchogaeth. ac yn damunaỽ chỽedleu

y ỽrth laỽnslot. Ac ar hynny ỽynt a|welynt marchaỽc a