LlGC Llsgr. Peniarth 11 – tudalen 274v
Ystoriau Saint Greal
274v
hynny. A unbennes heb·y meliot pa|bryt y ỻas y marchaỽc
yma. arglỽyd heb hi y bore doe y ỻadaỽd y marchaỽc o|r ga+
lis ef. ac ual|hynn y byd reit ymi y wylyat ef heno. ac auo+
ry ef a|daỽ yma. ac odyma ef a|a hyt y myỽn casteỻ. yn ỻe y
byd y walchmei ymlad a|ỻeỽ a hynny heb arueu. a|m ar+
glỽydes inneu mi a|r vorwyn a|dugost di yma a|dygir hyt
y ỻe y byd yr ymlad y·rỽng y ỻew a gỽalchmei. a gỽedy
darffo idaỽ ef ỻad gỽalchmei. ef a oỻyngir y diua yn ar+
glỽydes ninneu ony pheit a|r gret newyd yr honn a|gym+
merth hi yn|y casteỻ candeiryaỽc yn|y ỻe yr|oed ac y|mae
etto. ac yno y byd reit y minneu gymryt yn angheu. ỻaỽ+
en vu gan veliot y chwedleu am glybot y kaffei welet gỽ+
alchmei drannoeth. ac am y vot yn vyỽ. Arglỽyd heb yr
unbennes. yr duỽ keis amdiffyn y vorw˄yn honn auory. kan+
ys y marchaỽc a ynvytta o lit pan y gỽelo hi yma. ac ỽrth+
yt titheu dy hun heuyt. Paham heb·y meliot ponyt gỽr
yỽ efo megys minneu. Je arglỽyd heb hi. namyn creulon+
ach yỽ ef a ffyrnigach no thydi ar y|weletyat. Yno y bu ue+
liot y nos honno hyt trannoeth. ac ar hynny ef a glywei ~
drỽst y marchaỽc yn|dyuot trỽy y fforest megys tymestyl
uaỽr. ar yr oed gyt ac ef arglỽydes y casteỻ candeiryaỽc
ac yr|oed yn|y pherchi yn|drỽc ac yn|y churaỽ ac ysgỽrs. ac
yn by·gythyaỽ y vorwyn a|adyssei dynnu y marchogyon
y|r ỻaỽr. Meliot a|e harganuu yn dyuot. a chorr yn|y ol. yr
| « p 274r | p 275r » |