LlGC Llsgr. Peniarth 11 – tudalen 93r

marchaỽc yn|daly y chwaer yn|y mod hỽnnỽ ef a|vu drỽc ganthaỽ.

ac a|dywaỽt ỽrthaỽ. Tydi uarchaỽc heb ef ny welir ymi dy vot ti

yn|gymen. kanys pob morỽyn a|dyly bot yn ryd idi bop fford.

heb daly neb ryỽ aruer na|thoỻ. ac yn enwedic pob merch vonhe+

dic. Ac ual y bydant yn ymdidan ueỻy nachaf yn dyuot attunt

dec marchaỽc yn aruaỽc. a|chyt ac ỽynt vnbennes ieuanc. ac yn|y

ỻaỽ dysgyl aryant. Ac yna ỽynt a|dywedassant. ef a|vyd reit heb

ỽy y|r vorỽyn honno ae o|uod ae o anuod dalu y aruer y|r casteỻ. ~

Galaath yna a|ovynnaỽd pa|ryỽ aruer oed hỽnnỽ. Arglỽyd heb vn

o|r marchogyon pob morỽyn o|r a|del fford yma. ef a|vyd reit idi ro+

di ỻoneit y dysgyl honn o waet y vreich deheu idi. Emeỻdigedic

heb·y galaath vo y neb a|ossodes yr aruer hỽnnỽ rac y vileinyet

a|e drycket. ac myn y gỽr a|m nerthao i ti a ffaelyeist o hynny ar

y vorỽyn honn yma. kanys tra vỽyf vyỽ i o chret hi y|m|kynghor

i ny cheffỽch chỽi dim o|r aruer hỽnnỽ y genthi hi. Myn duỽ heb+

y peredur a bỽrt ny·ni a|odefỽn angheu yn gyntaf. Myn yn cret nin+

neu heb ỽynteu chỽitheu a|doethaỽch ar angheu. kanys pei at+

vydeỽch goreu marchogyon chỽi o|r hoỻ ˄vyt. nyt oed fford yỽch y bar  ̷+

hau. ac ar hynny pob vn a|gyrchaỽd y gilyd heb mỽy o gywrys+

ssed y·ryngtunt. Ac yna galaath a|e|gedymdeithyon kynn torri eu pe+

lydyr a|vỽryassant y dec marchaỽc urdaỽl. ac odyna ỽynt a|dyn+

nassant eu cledyfeu ac a|e|ỻadassant megys pei aniueilyeit mut

ueynt. ac ar hynny nachaf deugein marchaỽc yn aruogyon

yn|dyuot o|r kasteỻ. ac o|e blaen yd oed gỽr prud yr hỽnn a|dywaỽt

ỽrth y tri chedymdeith. arglỽydi heb ef ymroỽch ac na haedỽch aỽch

ỻad. kanys coỻet maỽr oed goỻi gỽyr kystal a|chỽi. ac am hynny  ̷