LlGC Llsgr. Peniarth 32 (Y Llyfr Teg) – tudalen 181
Llyfr Iorwerth
181
namyn y|r kyntaf o·nadunt a vrathỽyt. O|deruyd.
y|dyn yn anhos ysgrybyl y ar yt. ae torri eu
mynỽgyl. ae eu briỽaỽ. Ny dyly eu talu os enhy
yn|kyfreithaỽl. Sef hyt y dyly eu hanhos; hyt tra vỽ+
ynt ar y tir e|hun. Os kỽn a vyd ganthaỽ ynteu.
a ỻad o|e gỽn ef yr ysgrybyl; ef a dyly talu gỽei+
thret y aniueil. Os ỽrth y anhos ynteu y|daỽ kỽn
y gymodogyon; a ỻad o|r rei hynny yr yscrybyl;
iaỽn yỽ y baỽp kadỽ y aniueil rac agkyfreith.
ac ỽrth hynny talet baỽp onadunt dros y gi. Os
ynteu a|e henhy ỽy a|r kỽn dros y deruyneu e|hun;
camlỽrỽ a|dal y|r brenhin. a|r ysgrybyl y|r perchenna+
ỽc. Kyfreith aryf yỽ y damdỽg yn|y ỻaỽ y gỽelher.
ac ony ludyir ny dylyir ymdanaỽ na dirỽy na
chamlỽrỽ nac ar y warcheitwat nac ar y damdyg+
wr. namyn y gymryt yn ryd; o|r ỻudyir ynteu
bit ar y breint yd holer. O deruyd. y·rỽg deu·dyn am
geissaỽ creireu y damdwng peth; kyfreith. a|dyweit panyỽ
y neb pieiffo ỻithraỽ y ỻỽ bieu keissaỽ y creir.
kanys y creir a dewisso ef a dyly bot yno. Tri
dyn y traenha y brenhin. ac ỽynt; y vrenhines
a|r penteulu. a|r pen·kynyd. Y vrenhines a dyly
traean gan y brenhin. ym·pob ỻe dyeithyr yg|gor+
wlat. O|r anreith a|wnel y teulu y dyly y penteu+
lu ran deuỽr. a|r traean o|r a|del y|r brenhin. Pen+
kynyd a|dyly ran deuỽr o grỽyn yr aniueileit hely.
| « p 180 | p 182 » |