LlGC Llsgr. Peniarth 45 – tudalen 125
Brut y Brenhinoedd
125
ỽrthunt mynet partha* a|e lety yn trist a|wna+
eth a|e hadaỽ hỽynteu yn|y neuad yn yuet. Ac
gỽedy gwelet hynny o|r fichtyeit a thebygu
mae o prudder y dywedassei; Tristau a wnaeth+
ant hỽynteu yn uỽy no meint. A dywedut y
rydunt paham na ladỽn ni y manach hỽn me+
gys y caffo Gortheyrn cadeir y teyrnas. Pỽy
a dylyei urenhinyaeth yn well noc ef Canys
teilỽng oed y hynny y gỽr ny orffỽyssỽys yn han+
AC yn diannot kychwyn a|w +[ rydedu ni.
naethant am penn ystauell y brenin. A|e lad
a dỽyn y penn rac bron Gortheyrn. A phan welas
ef hynny. Tristau megys ỽylaỽ. Ac eissoes ny
bussei lawenach ef eiroet o uyỽn noc yna. Ac
yna galỽ a|wnaeth attaỽ wyr llundein Canys
y gỽnathoedit y gyflauan honno ac erchi udunt
daly y bratwyr hynny. Ac odyna eu dihenydu
am wneuthur kyflauan kymeint a|llad y brenin.
A rei a|dywedei panyỽ Gortheyrn a paryssei hyn+
ny. Ereill a|e diheurei. Sef a wnaeth tatmaeth+
eu y meibon ereill. Emreis wledic. Ac uthur penn+
dragon. fo ac wynt hyt yn llydaỽ rac ouyn gor+
theyrn. Ac yn|yr amser hỽnnỽ yd oed emyr lly+
daỽ yn urenin. yn llydaỽ. Ar gỽr hỽnnỽ a aruolles
y meibon hynny yn llawen. Ac a peris eu meith+
rin mal y dylyit y teyrned o lin brenhined. ~
| « p 124 | p 126 » |