LlGC Llsgr. Peniarth 45 – tudalen 84
Brut y Brenhinoedd
84
ef. Ti a geffy heb ef urenhin cadarn creul+
aỽn y|th erbyn o ynys prydein. Gweiryd a+
dar·wenidaỽc yỽ y enỽ. Nyt oed yn ymlad
gỽr cadarnach noc ef. Nyt oed ar hedỽch gỽr
arafach noc ef. Ac gỽedy teruynu diewoed
y uuched a|e uarỽ. Y cladỽyt yg caer gloeỽ
y myỽn temyl a wnathoed e hun yr anry+
ded y gloeỽ amheraỽdyr ruuein. ~ ~ ~ ~ ~
AC gỽedy marỽ Gweiryd. y doeth meuryc
y uab ynteu yn urenin. Gỽr anryued y
doethineb oed hỽnnỽ. Ac ym pen yspeit gỽe+
dy gỽledychu o·honaỽ. y doeth Rodric uren+
hin y fichtyeit o scithia a llyghes uaỽr gan*
yr alban yr tir. A dechreu anreithaỽ y gỽ+
ladoed hynny a dyuot a oruc meuryc yn|y
erbyn a chynnulleitua uaỽr gantaỽ ac ym+
lad ac ef a|e lad. Ac gwedy cael o ueuryc y
uudugolaeth. Dyrchauel maen maỽr a oruc
yn arỽyd cael o·honaỽ ef y uudugolaeth. y+
n|y wlat a elwit wintymar o|e eno ef. Sef
yỽ hynny yg kymraec gỽys meuryc. Ac
yn|y maen hỽnnỽ yd ysgriuenỽyt gweith+
redoed meuryc y cadỽ y cof er hynny hyt hediỽ.
AC gỽedy llad Rodric y rodes meuryc
rann o|r alban yr bobyl a dothoed gyt
| « p 83 | p 85 » |