Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 73r
Marwolaeth Mair
73r
y heneit yn gynn gannheidyeit ac na allei nep
ryỽ dyn marỽaỽl datkanu a|e dauaỽt y|thecket.
tegach oed noc a|uu eiroet o eira na mettel nac
aryant nac eur yn echtywynnygu o|diruaỽr
eglurder. Ac yna y|gorchymynnaỽd yr arglỽyd
eneit meir y vihagel archangel yr hỽnn a|oed
geittỽat paradỽys. A|thyỽyssaỽc kenedyl eurei.
Ac yna y|dyỽat yr arglỽyd vrth yr ebestyl. ket+
ỽych gorff meir. A|dygỽch ef yr parth deheu yr
dinas y|tu ar|dỽyrein. Ac yna y caỽssant myn+
nỽent neỽyd yn|y lle ny ry|gladyssit dyn eiroet.
A gỽedy as|cladaỽch hi. arhoỽch yno yny delỽyf|i
attaỽch chỽi ym|penn y|tridieu. A gỽedy dyỽe+
dut hynny o|r arglỽyd yd aeth ymeith. Ac ene+
it y|vam. A|e gyssegredigyonn engylyonn gan
diruaỽr eglurder y|nef. Ar engylyonn a aethant
drỽy lewenyd maỽr gann ganv molyannhev
yr arglỽyd. Sef a oruc y|teir gỽerydonn a|oedynt
yno kymryt y corff o|e olchi o|deuaỽt y|rei a|el+
ynt y angheu. A phann dechreuassant y|noethi
y|tywynnaỽd o diruaỽr eglurder val na ellit
edrych arnaỽ. kynn haỽsset oed gỽassanaethv
y|chorff santeid glan hi ar dim haỽssaf. rac
y gannheidet hagen ny chynnttrinnyei neb ac
ef. A chynny olchit glan oed o|bop kyuryỽ vod
| « p 72v | p 73v » |