LlGC Llsgr. Llanstephan 4 – tudalen 5r
Claddedigaeth Arthur
5r
droetued ar|bymthec neu a|vei vỽy o
dyfynder yn|y|daear. o achaỽs eu brys ỽy
yn vỽy noc o achaỽs anryded cladu gỽr kyf+
urd a hỽnnỽ. ac nyt oed ryued hynny yn+
y kymheỻei gynnỽryf ryuel ỽynt a|gouit.
ac odyna y dywededic abat hỽnnỽ o arch
a dysc henri vrenhin a beris gỽneuthur
ysgrin arderchaỽc o vaen marmor y es+
gyrn arthur. megys y gỽedei ac y|dylyit y
seilyaỽdyr pennaduraf y ỻe hỽnnỽ. ac
ynteu y|r eglỽys honno yn vỽy noc eglỽ+
ysseu yr hoỻ deyrnas. ac ef a|e gỽnathoed
yn gyuoethaỽc o|dir a|daear yn amyl ac
yn ehalaeth. ac nyt heb y obryn o·honaỽ
ynteu. namyn o gyfyaỽn vraỽt duỽ
y gỽr a|dal pỽyth pob da yn ehalaeth heb
petruster. nyt yn|y nef e|hun. namyn ar
y daear heuyt ac yn vyỽ ac yn varỽ.
a gỽedy bo marỽ. yn|y vuched dragyỽyd.
ac yn|y diwed yn|y vanachlaỽc hynaf
ac aỽdurdodaf o|r hoỻ deyrnas y cladỽyt
arthur yn anrydedus megys y gỽedei kyf+
lehau gỽr kymeint y|glot a|e anryded a
hỽnnỽ. Ac veỻy y teruyna cladedi+
gaeth arthur vrenhin ~ ~ ~ ~ ~ ~
| « p 4v | p 5v » |