LlGC Llsgr. 3035 (Mostyn 116) – tudalen 102r
Brut y Brenhinoedd
102r
ethaf oed ac aeduet o oet. Ac o achaỽs y| molyaneu a| r de ̷+
uodeu da hẏnẏ yn| y glotuori; y brenhin a rodassei anna y
verch idaỽ A| ỻywodraeth y teyrnas hyt tra yttoed y bren+
hin yn gorwed yn| y glefyt. A| r gỽr hỽnnỽ gỽedy mynet o+
honaỽ a dechreu y ymlad a| r gelynyon yn vynych y kilyei
racdunt megys y| bei reit idaỽ kyrchu y dinassoed kadarn
racdunt. Gỽeitheu ereiỻ y bydei vudugaỽl ac y| gỽasgarei
ỽynt y| r| koedyd ac y| r mynyded ac y| r kerryc. gỽeitheu ereiỻ
y| kymheỻei ỽynt y| eu ỻogeu yn| waratwydus Ac y·veỻy
hir pedruster ymlad a vu yrydunt Megys na aỻei neb gỽy+
bot py diỽ y dylhei y vudugolyaeth. Kanys syberwyt y| bry+
tanyeit a| oed yn eu hargywedu ỽrth nat oed teilỽg gan+
tunt bot ỽrth gygor y jarỻ yn eu ỻywyaỽ Ac ỽrth hẏnnẏ
yd| oedynt wanach ac ny eỻynt gaffel budugolyaeth oc eu
gelynẏon. A| gỽedy dyuot a daruot anreithaỽ yr ynys hayach
yn| hoỻaỽl. pan venegit hyny y| r brenhin ỻityaỽ a| oruc yn vỽy
noc y| dylyei ac y deissyfei y glefyt a| e wander. Ac erchi dyfynu
hoỻ wyrda y| teyrnas hyt attaỽ ef ỽrth eu agreithaỽ am eu
syberwẏt. A| phan welas ef paỽb rac y gyn·drycholder ef. ym+
gerydu ac ymgeinyaỽ y·gyt a| chospedigaetheu a dywaỽt
ỽrthunt A| thybygu a| wnaeth yd aei e| hun yn eu blaen yn er+
byn y| elynyon. Ac ỽrth hyny gorchymyn a| oruc gỽneuthur
elor idaỽ yn yr hỽn y| geỻit y dỽyn yndi. kanys ẏ| glefyt a| e
wander a| ludyei hyt nat oed haỽd y dỽyn ynteu yn ansaỽd
araỻ Ac ygyt a hynẏ gorchymyn a| oruc y| baỽb yn baraỽt er+
byn pan vei reit ỽrthunt ỽrth ymgyfaruot ac eu gelynyon.
a| heb vn gohir paraỽt vu yr elor A| pharaỽt vu baỽb yn erbyn
y| dyd teruynhedic.
A gỽedy dyuot y| brenhin hyt yn verolan y| ỻe a| elwir yr
aỽrhon seint alban. Yn| y| ỻe yd| oedynt y| racdywedigẏon
| « p 101v | p 102v » |