LlGC Llsgr. 3036 (Mostyn 117) – tudalen 160
Brut y Brenhinoedd
160
wyr a phetwar canhỽr heb dianc vn onyt my hu+
nan a damweinỽys im kaffel trossaỽl. Ac a hỽnnỽ
yd ymdiffereis ac y deuthum yn uyỽ y ỽrthunt. A
hynny o ieirll a barỽneit a marchogyon urdaỽl.
A hyt tra yttoed eidol yn dywedut hynny. yd oed
emreis yn annoc y lu. Ac yn dodi y holl obeith yn
duỽ. Ac odyna yn leỽ ac yn ỽychyr kyrchu eu gel+
ynyon. Ac ymlad tros eu gulat a thref eu tat.
AC o|r parth arall yd oed hengist yn bydinaỽ
y lu ac yn eu dyscu. Ac yn kerdet o vydin y
gilyd y annoc gleỽder yndunt. Ac o|r diwed guedy
eu bot yn paraỽt ymgyrchu a|wnaethant. Ac yn|y
lle ellỽg creu a guaet o pop parth yn ditlaỽt. Ac
yna yd oed emreis yn annoc y gristonogyon ef.
Ac o|r parth arall yd oed hengyst yn annoc y pagany+
eit ynteu. A thra yttoedynt ỽy y velly yd oed eidol
ynteu yn ymgeis a hengist. Ac eissoes ny|s cauas
yna. kanys pan welas hengyst y brytanyeit yn
goruot. ar saesson yn plygu; Sef a|wnaethant
kymryt eu ffo a chyrchu kaer gynan. Ac eu her+
lit eissoes a oruc emreis udunt. A phan weles hen+
gist bot Emreis yn eu herlit. nyt aeth yr kastell
megys y|mynassei. namyn bydinaỽ y lu eilweith.
Ac ymhoelut ar emreis can guydyat na allei gyn+
hal y kastell racdaỽ kyt as|ceissei. Ac ỽrth hynny y|do+
des y holl obeith a|e amdiffyn yn|y wayỽ a|e taryan
a|e gledyf. Ac yna bydinaỽ a oruc emreis o newyd.
| « p 159 | p 161 » |