LlGC Llsgr. Peniarth 12 rhan ii – tudalen 56v
Ystoria Lucidar
56v
hỽnnỽ megys y myỽn ỻyfyr y darỻein paỽb beth a|weỻygyas+
sant neu a|wnaethant o|r gorchymynneu. ỻyfyr y vuched yỽ
grym dỽywaỽl. ac yno y gỽyl paỽb eu kyt·wybot megys yn
ysgriuennedic. discipulus Beth a vyd yna yn ol hynny. Magister Gỽedy dar+
ffo y vraỽt diaỽl yna a|e hoỻ gorff. sef yỽ hynny yr hoỻ
rei ennwir. a|vyrir yng|karchar nyt amgen y myỽn tan
a|brỽnstan benn·dramynỽgyl. a|christ a|e wreicbỽys. sef yỽ
hynny. a|e etholedigyon yn vudugaỽl o ogonyant a ymcho+
el y nefaỽl gaerussalem y dinas y dat ef. discipulus Pa beth a|dywe+
dir ef a|wassanaetha udunt yn mynet heibyaỽ. Magister Bỽrỽ ym+
eith ffuryf y was yỽ hynny. a|dangos o|e etholedigyon pa
ryỽ vn yỽ ef yn|y ogonyant. megys y|dywedir mi a|ymdan+
gossaf vy|hun. discipulus Pa beth a|dywedir. duỽ a|vyd pob peth ym
pob peth. Magister Dynolyaeth crist yỽ hynny. a|r hoỻ eglỽys a
wledychant yn|dwywolder. a|duỽ a uyd ỻewenyd y baỽp y·gyt
ac y baỽp ar neiỻ tu. a|phaỽp y·gyt a lawenhaant o edrych
arnaỽ|ef. discipulus Beth am y byt wedy hynny. Magister Y dorri. kanys
megys y bu drech gynt dỽfyr diliỽ no|r byt. ueỻy y|byd uch
y tan yna pymthec kufyt no|r mynyd uchaf. discipulus A baỻa y byt
yna o gỽbyl. Magister Symut y defnydyeu a|wneir. a phoeneu
pechaỽt. nyt amgen noc oeruel a gỽres. a|chenỻysc. a|chyn+
hyr·ueu a meỻt. a tharaneu. ac anghymwynasseu ereiỻ
a|difflannant o gỽbyl. Y defnydyeu pur hagen a|drigyant
yn eu ỻe megys y dywedir. Ti a|e|symudy ỽynt. ac ỽynt a
symudir. kanys megys y byd anghyffelyb ansaỽd a|ỻun
yn kyrff ni yna noc yr aỽrhonn. veỻy y|difflanna yr ansaỽd
yssyd yr aỽr·honn. ac y byd anghyffelyb y|ffuryf rac ỻaỽ herỽyd
| « p 56r | p 57r » |