LlGC Llsgr. Peniarth 15 – tudalen 130

o py kenedl pan ỽyt ti dwet im a ỽyt ryd a|bonhedic. Margaret

a ỽrthebaỽd. ryd ỽyf|i a|christonoges ỽyf yr vcheluaer a dywa+

ỽt pỽy dy enỽ di. Hitheu a|dỽywat Margaret y|m gelwir ac

ynteu a|dỽwat py gret yssyd gynnyt ti. Mi a gredaf yn duw

hoỻ·gyfoethaỽc. ac yn iessu grist y vab ef a|n harglỽyd ni

y gỽr a getwis vyg|gwyrdaỽt i. hyt hynn. A minheu yn di*+

uagy dihalaỽc. Oliỽer a|dywat os gỽir hynny crist a wediy

Ac arnaỽ y gelwy vrth dy reit y gỽr y groges yr idewon.

Margaret a|ỽrthebaỽd dy tadeu di a groges iessu grist ac vrth

hynny neur derynt ỽy. ef a bara yn tragywedaỽl. Ac ne* byd

teruyn na diwed ar y vrenhinyaeth ef. Ac yna y sorres y

braỽdỽr ac yd erchis bỽrỽ y gwynededic vargaret yn|y kar+

char tra vei ef yn keissaỽ ystryỽ a dechemic bywyd y gaỻi* ef

goruot ar y|haruedyt hi. Am y gret a|e gwyrdaỽt hi. Ac vrth hyn+

ny yd aeth ef odyno y dinas antioches a oed geir·ỻaỽ. y adoli y eu

dỽyeu ef deiỻon a mutyon. Ac y geissaỽ nerth y gantunt ỽy y hyn+

ny. Ac ym·hen yr eil·dyd yd eistedaỽd ef Megys braỽdỽr yn|y ỻe y

bydei y varnn. Ac yd erchis dỽyn y|wynuededic vỽrỽyn*. rac y

vron ef. a gwedy y dyuot hi. ef a dywaỽt ỽrthi. Trugarhaa vỽrỽ+

yn vrth dy corff a|th tegỽch a|th tyner ieuectit. gwarandaỽ di vyg

kyghor i. Ac adolha vyn dỽyeu i. a mi a rodaf itti gyfỽeth ac yn+

reded mỽy noc y neb o|m hoỻ tylỽyth. Margaret santes a ỽrtheba+

ỽd. duỽ a ỽyr heb hi y neb a croesses vyg|gỽrdaỽt hyt na elly ti

vyn trossi. i. na|m kyffroi i|ar fford y wiryoned yr hon a dechre+

ueis y chynhal. Ac ymdeeis hyt hynn. kanys hỽnnỽ a adolhaf i

y neb a keffyr* y daear racdaỽ Ac y kryn y mor. Ac y byd ofynaỽc

y|gỽynoed a|r hoỻ creaduryeit racdaỽ. Ac yna y dywaỽt y bra+

ỽdỽr Onit adoli|ti vyn dỽyeu i. vyg|gledyf|i a trywanha ac a

veistrolha dy gnaỽt a|th escyrn a|paraf   eu ỻosci. Ac o gweren+

dewy|di vyg|gyghor i. a chredu ac adoli vyn dỽyeu i. a ni a

vydỽn vn eneit. ac vn garyat. Margaret a dywaỽt

neu derỽ imi rodi vy|ghorff y araỻ. Megys y kaffỽyf in+

heu gorffowis gyt a glan wyrydon. Crist a|rodes y

goroff* a|e eneit hyt agheu drossom|ni. A minheu a rodes

ve goroff a|m eneit yrdaỽ ynteu. nyt oes arnaf i ofyn

dy agheu di. kanys crist a|m croesses i. ac arỽyd y lan

groc ef. Ac yna yd erchis Oliber vraỽdỽr o|e geisseit.