LlGC Llsgr. Peniarth 32 (Y Llyfr Teg) – tudalen 85
Llyfr Iorwerth
85
araỻ idaỽ ar yr yscỽr berued y|r hirieu. a|hyt y
kyrhaedo a honno o bop tu idaỽ yỽ ỻet yr erỽ.
a|dec ar|hugeint yn|y hyt. Ereiỻ a dyweit pa+
nyỽ gỽialen kyhyt a|r gỽr hỽyaf a vo yn|y tref
a|e laỽ vch y benn. ac vn·ryỽ gerdet a honno
ar y ỻaỻ. Ony byd tei; y mab ieuaf a|dyly ran+
nu oỻ tref y dat. ac o hynaf y hynaf dewis+
saỽ hyt ar yr ieuaf. Os tei a vyd; Y braỽt eil
ieuaf a dyly rannu y tydynneu. kanys dilys
bren vyd ynteu yna. ac ynteu gỽedy hynny
rannu oỻ tref y dat. ac o hynaf y hynaf dew+
issaỽ. a|r rannyat hỽnnỽ a bara yn oes y
brodyr. Gỽedy bo marỽ y brodyr; y kefynderỽ
a dyly kystadlu o|mynnant. Sef ual y dylyant;
etiued y braỽt ieuaf a dyly kystadlu. ac eti+
ued y braỽt hynaf dewissaỽ. ac ueỻy o hynaf
y hynaf hyt ar yr ieuaf. a|r gyfran honno
a|dyly bot y·rygthunt ỽynteu yn|eu hoes. ac ̷
o·ny byd da gan y kyferderỽ y gyfran a vu
rỽng eu tadeu; ỽynt a|dylyant kymeinhaỽ
mal y kefynderỽ. A gỽedy y rann honno ny
dyly neb na|chymeinhaỽ. na rannu. am tir
gỽelyaỽc y|dylyir mal y dywedassam ni uch+
ot. Tir kyỻidus ny dylyir y rannu herỽyd
brodyr. namyn maer a|chygheỻaỽr a|dyly+
ant rannu. a rodi y baỽp kystal a|e|gilyd
| « p 84 | p 86 » |