Breudwd Rhyddiaith Gymraeg 1300-1425
English

Caergrawnt, Llsgr. Coleg y Drindod O.7.1 – tudalen 40r

Llyfr Blegywryd

40r

ny byd hỽyrach no chynt y keffir
or trydyd. Tri cham wereskyn yssyd;
un yỽ gỽereskyn yn erbyn y perch+
enhaỽc oe anuod a heb uraỽt. neu
wereskyn trỽy y perchenhaỽc. Ac
yn erbyn y etiued oe anuod a heb
uraỽt. neu wereskyn trỽy wercheit+
wat. Ac yn erbyn y iaỽn dylyedaỽc
oe anuod a heb uraỽt. Perchenhaỽc
yỽ y neb a uo yn medu y dylyet dilis
Gỽercheitwat yỽ y neb a gynhalyo
neu a warchattwo dylyet dyn arall.
O Tri mod y dosperthir dadyl dat+
anhud rỽg etiuedyon. nyt am+
gen trỽy tri breint annyanaỽl. kyn+
taf yỽ breint oet rỽg yr hynaf. Ar
ieuhaf. Eil yỽ breint priodas rỽg
etiued kyfreithaỽl. Ac un aghyfreith+
aỽl. kanys y kyfreithaỽl ae keiff oll.
Trydyd yỽ breint dylyet rỽg dy+
lyedaỽc ac andylyedaỽc. Os tadeu
y rei hynny a gynhalyassant yr vn
tir wers tra gỽers hyt eu hageu. A
dyfot eu meibon y erchi datanhud;