Caergrawnt, Llsgr. Coleg y Drindod O.7.1 – tudalen 7r
Llyfr Blegywryd
7r
yr lladedic yn ỽr eglỽyssic rỽyme ̷+
dic ỽrth vrdeu kyssegredic. neu ỽrth
greuyd. neu glafỽr. neu vut. neu
ynuyt. ny thal ac nyt erbynya
dim dros alanas. ny dylyir gỽneu ̷+
thur dial ar vn or rei hynny dros
alanas. Ac ny dylyant ỽynteu dial
y neb a lather. Ac ny ellir kymhell
o neb fford y talu nac y erbynyaỽ
dim dros alanas. Tri dygyngoll
kenedyl ynt. Vn yỽ dechreu o wely+
gord talu galanas dyn a lather. Ac
na thalỽyt cỽbyl. Ac am hynny llad
vn or welygord honno. ny thelir ga+
lanas hỽnnỽ ac nyt atuerir dim
dros y kyntaf or a talỽyt. Eil yỽ bot
kyssỽynuab y myỽn kenedyl heb y
dỽyn a heb y wadu. A llad dyn o hỽn+
nỽ; talu yr alanas oll a vyd reit yr
genedyl honno drostaỽ. Ac os gỽadant
gỽedy hynny; dygyn·goll yỽ. Tryded yỽ
pan enllipper gỽiryon am gelein Ac
na wnel iaỽn am hynny namy* tremyc.
| « p 6v | p 7v » |