Llsgr. Caerdydd 1.362 (Hafod 1) – tudalen 60v
Brut y Brenhinoedd
60v
attadunt. A gỽedy dyuot paỽb y gyt o|r yscolheigy+
on ar llygyon*. kyssegru emreys a|wnaethant
yn vrenhin. Ac yn herỽyd eu kynheuaỽt gỽr+
hau idaỽ. Ac mal yd oed paỽb yn annoc mynet
am ben y saesson. Sef a oruc emreis annot hyn+
ny hyny darffei idaỽ yn gyntaf gaffael gỽrthey+
rn. kans kymeint oed y lit o achaỽs y brat a
ry|wnathoed wrtheyrn yỽ tat ef. Ac nat oed
well gantaỽ wneuthur dim o|r a wnelei no phe*+
dyaỽ ony chaffei yn gyntaf dial y lit ar wrthe+
yrn. Ac ỽrth hynny ymchoulut a oruc parth ac
ymyleu kymry. A chyrchu kastell goronỽy y lle
y ffoassei ỽrtheyrn idaỽ y geissaỽ diogelỽch. Sef
lle yd oed hỽnnỽ yrgig ar lan gỽy auon y mynyd
clorach. A chỽedy dyuot emreis hyt yno coffau
a wnaeth y brat a wnathod wrtheyrn yỽ tat a|e
vraỽt. A dywedut wrth eidol iarell* caer loyỽ.
Edrych ti tywissaỽc bonehdic* yn graf adeilade+
u y kaer ar kastell. Ac a|tybygy ti a allant hỽy
diffryt gỽrtheyrn racgoffi megys na|chaffỽyf gu+
dyaỽ blaenllymder vyng cledyf yndaỽ. kan haedỽys
ef agheu megys y gỽdosti. kans yn gyntaf y bre+
dychỽys ef vy tat i. y gỽr a rythaỽys y wlat. ac
ynteu y gan ormes y|ffichteit. A chỽedy hynny y bre+
dychỽys constans vy mraỽt. Ac o|r diwed gỽedy
y vot e|hun yn vrenhin y duc estraỽn genedyl saes+
son paganyeit. y geissaỽ distryỽ y kiỽtaỽtwyr. Ac
y tybygy ti y vot yn cadỽ yn* kadỽ* fydlonder y min+
eu. Ac eissoes heb ef megys y canhadaỽd duỽ; neu
| « p 60r | p 61r » |