LlGC Llsgr. Llanstephan 27 (Llyfr Coch Talgarth) – tudalen 117r
Efengyl Nicodemus
117r
gỽr enrydedus y dodet y myỽn bed newyd. ac y mae yr enrydedus
wr hỽnnỽ yn tystu y welet ef yn vyỽ gỽedy y angeu. a|r try+
wyr hynn heuyt a|gadarnhaant y welet ef gyt a|e disgyblon
yn ymdidan ym mynyd oliuet. ac odyna yn|esgynnu y nef.
Ac yna y kyuodes Joseph y vyny yn eu kymherued ac y dy+
waỽt ỽrth annas a chaiphas. ac ỽrth yr Jdewon ereiỻ. Da
yd yỽch yn enryuedu pan glywssaỽch gỽelet Jessu yn ky+
uodi o|r mynyd ac yn esgynnu y nef. Mỽy o anryuedaỽt
hagen oed pan gyuodes ef o ved ry gyuodi ohonaỽ ỻawer o
ueirỽ. ac a welet ỻawer ohonunt yng|kaerussalem. a|gỽaran+
deỽch yr|aỽr·honn arnaf|inneu. Nyni oỻ a|atwaenem sẏmeon
offeiryat pennadur yr hỽnn a gymerth Jessu yn uab y+
rỽng y dwylaỽ yn|y demyl. a bot deu uab yn deu vroder vn+
uam. a|phan aeth y rei hynny o·dyma ni a vuam ỽrth eu
cladedigaeth. ac aỽn y edrych bedeu y rei hynny. agoret ynt
yr pan|gyuodassant. a ỻyma ỽynt yn vyỽ yn arimathia
yn gỽediaỽ yn wastat. a|rei a|glyỽssant eu hatleis ac ny dyỽ+
edant dim ỽrth neb hagen. namyn tawedaỽc ynt mal|meirỽ.
ac aỽn yno gan|diruaỽr enryded. a ni a|e|dygỽn ỽynt atta+
ỽch. A gỽedy archom udunt yn enỽ duỽ. agattoed ỽynt a|dy+
wedant ỽrthyỽch. ac a|datkanant yỽch eu|kyuotyat. a|r enry+
uedaỽt hỽnnỽ. A|phan|glywsant hynny ỻawen vu baỽp o+
honunt. a|mynet a|orugant annas a chaiphas a nichode+
mus a Joseph ac amaliel y edrych y bedeu. ac ny|s caỽs+
sant yno ỽynt. Ac odyna y kerdassant y dinas arimathia.
Ac yno y caỽssant ỽynt ar dal eu glin·yeu yn eu gỽedi. a
mynet dwylaỽ mynỽgyl udunt yn enrydedus gan ovyn
| « p 116v | p 117v » |