LlGC Llsgr. Llanstephan 27 (Llyfr Coch Talgarth) – tudalen 147v

aruthyr oed y gỽelet. Ac yna y diefyl a|dywaỽt ỽrthaỽ. O|r

mynny di ufudhau ynni ac ymchoelut drachefyn. ti a

eỻy vynet y|th wlat yn diogel y ỽrth y perigyl hỽnn yma.

Y marchaỽc ffydlaỽn yng|crist hagen a vedylyaỽd y saỽl be+

rigyl y rydhaaỽd Jessu grist ef o·honunt gan alỽ y enỽ ef.

a dechreu kerdet y bont a|oruc dan uessuraỽ troeduedeu. a

galỽ enỽ Jessu grist. a|dodi y ymdiret yn yr arglỽyd a|wna+

eth. a cherdet yn gadarn heb synnyeit beth oed dan y draet.

a phei beỻaf y kerdei y bont vỽy·uỽy a gaffei. ac yn|y ỻe

ef a gynydaỽd ỻet y bont ual y gaỻei garr olỽynaỽc uy+

net arnei. a|r diefyl a|dugant y marchaỽc yno a safassant

ar benn y bont heb aỻu mynet ymblaen hynny. nam+

yn ymadolỽyn ỻithraỽ y marchaỽc dros y bont. A phan

y gỽelsant ỽy efo hagen yn mynet yn ryd. kyffroi yr aw+

yr a ỻefein a|wnaethant. yny oed anhaỽs idaỽ ef diodef

yr utua honno a|r ỻefein no|r hoỻ boeneu ereiỻ oỻ a|odef+

assei gynt ganthunt. A phan weles wynt heb aỻu ker+

det y bont. diogel vu ganthaỽ ynteu y hynt gan goffau

y war athro ef. Y diefyl a|oed dan y bont ỽynteu a vỽryas+

sant uacheu heyrn attaỽ ef y geissyaỽ y attal ac yn+

teu a|aeth yn|didrỽc y ganthunt ỽy. A gỽedy y uynet yn

diogel. edrych a|oruc yn|y gylch. ac abreid y gỽelei ef let y bont

o|bop parth idaỽ. A gỽedy mynet y marchaỽc yn ryd y ỽrth

y diefyl o|bop parth. ef a|welei mur maỽr uchel rac y vronn

o|r daear hyt yr awyr. ryued hagen oed uchet y mur. ac

nyt oed dim kyffelyb o degỽch idaỽ. ac vn peth a|welei ar y

mur. a hỽnnỽ yn echtywynnedic o|vein gỽerthuaỽr ac eur