LlGC Llsgr. Llanstephan 27 (Llyfr Coch Talgarth) – tudalen 18v
Ystoria Lucidar
18v
na newyn na sychet gỽedy hynny vyth. ac am eu govit ym+
ma ny byd arnadunt na dolur na chỽynuan. ac ueỻy y prof+
ir bot y rei gỽirion yn gyfoethaỽc ac yn wynuydedic vyth.
a|r rei ennwir yssyd eissiwedic a|thruein. discipulus Pa le y byd teilyng+
daỽt. Magister Y gan duỽ y mae pob teilyngdaỽt. a|phob medyant
na drỽc vont. Odyna y dywedir. Nyt oes vedyant onyt y
gan duỽ. ef a|venyc hagen uchot paham y keiff y rei drỽc
vedyant weitheu. a|r rei da weitheu ereiỻ. discipulus Beth a|verny
di y|r neb a|wertho neu a|bryno teilyngdaỽt. Magister Y neb a|e
pryno ef a|a y·gyt a|simon magus y|nghyfyrgoỻ ufferna+
ỽl. ac a|e gỽertho ef. a|daỽ clafri ar y eneit y·gyt a gyezi*. discipulus
a vyd mỽy gan duỽ gobrỽy y brelatyeit noc y ereiỻ. Magister Y rei
a vo ragor arnunt o|deilyngdaỽt eglỽyssic yma. megys
esgyb neu offeiryeit. os ỽynt a|dysgant y bobyl o eir ac ang+
kreifft. y geniuer eneit a iachaer drỽydunt ỽy. y geniuer
gobrỽy a gaffant ỽynteu yn ragor rac ereiỻ. Megys y dyỽ+
edir. ef a gynnỽyssir ỽynt ym medyant y hoỻ da. Os ỽynteu
a tynn geir iechyt y gan y rei yssyd ydan eu medyant. ac
eu tywyssyaỽ ỽynt y o·gof angeu drỽy angkreiffteu dybryt.
ỽynt a gaffant y geniuer poen yn ragor rac ereiỻ ynghy+
ueir y geniuer eneit a goỻer oc eu hangkreiffteu ỽy. neu
a weỻygyassant o|e hiachau gan bregethu udunt. Odyna
y dywedir. Mỽy a|holir y|r neb mỽyaf a orchymynner idaỽ.
ac eilweith y dywedir. Y kedyrn a odef ant boeneu yn ga ̷+
darn y pechaduryeit bydaỽl. me gys y brenhined a|r
braỽtwyr. o|r barnant yn|gyfy aỽn. a|thraethu y gỽeiny+
eit yn|drugaraỽc. mỽy vyd eu gobrỽyeu ỽynteu noc ereiỻ
| « p 18r | p 19r » |