LlGC Llsgr. 3035 (Mostyn 116) – tudalen 145r
Brut y Tywysogion
145r
Jeuaff. a gỽedy hynẏ y croget. Ac yna y diffeithỽẏt gỽhyr y gan
einaỽn vab ỽein. ac y|diffeithaỽd. Marc vab herald ben mon.
Deg|mlyned a|thrugein a naỽ cant oed. oet. crist pan diffeithaỽd gotbric
vab herald. von. ac o vaỽr ystryỽ y|darystygaỽd yr hoỻ ynys.
ac yna y kynuỻaỽd etwart vrenhin y|saesson diruaỽr lyges
hyt yg|kaer ỻion ar ỽysc. ac y|gỽrthladỽyt Jago o|e gyfoeth.
ac y|gỽledychaỽd hywel drỽy vudugolyaeth. ac yc* |hedychỽyt
Meuruc vab Jdwal ac y|bu uarỽ Morgan. ac yna y bu varỽ
edgar. vrenhin y|saesson. ac yd aeth dỽnỽaỻaỽn vrenhin ystrat
clut y|rufein. ac y|bu varỽ Jdwaỻaỽn vab einaỽn. ac eilweith
y|diffeithaỽd einaỽn ỽhyr ac y|diffeithỽyt ỻỽyn kelynaỽr vaỽr
y|gan hỽel ap Jeuaf a|r saesson. ac yna y|delit Jago ac y|goruu
hỽel ap jeuaf ac y gỽerysgynỽys kyuoeth Jago. ac y|ỻas
Jdwal. a|gỽedy hẏnẏ y|diffeithaỽd gustenyn vab Jago a|gotbric
vab herald lẏẏn a|mon. a|gỽedy hẏnẏ y|ỻas custenẏn vab jago.
y|gan hywel ap Jeuaf yn|y vrỽydyr a elwir gỽeith hirbarth.
Petwar|ugein mlyned a naỽ cant. oed. oet. crist. Pan diffeithaỽd gotbric
vab herald dyuet a|mynyỽ. ac y bu weith ỻan wenaỽc. ac
yna y diffeithỽyt brecheinaỽc a hoỻ gyuoeth einaỽn ap ywein
y|gan y|saesson ac aluryt yn dywyssaỽc arnunt. a hywel
ap Jeuaf ac einaỽn a|ladaỽd ỻawer o|e lu. ac yna y|ỻas einaỽn
ap ywein drỽy dỽyỻ gan vchelwẏr gỽent. ac y bu varỽ bon+
hedic escob. ac y|ỻadaỽd y saesson hywel ap Jeuas drỽy dỽyỻ.
| « p 144v | p 145v » |