LlGC Llsgr. 3035 (Mostyn 116) – tudalen 181r
Brut y Tywysogion
181r
dyuot gỽyl galixtus bab erchi a|wnaeth y brenhin gyru
y ỻogeu o|r porthua y|r mor a|r dyd hỽnỽ ysgynu y ỻogeu
a oruc ac etto nyt oed gymỽynasgar y gỽynt vdunt. ac
o achaỽs hẏnẏ ymhoelut a|wnaeth drachefyn y|r tir. ac
ychydic nifer gyt ac ef. a|r nos gyntaf gỽedy hyny yd
ysgynaỽd y logeu gan ỽylaỽ o·honaỽ ef e|hun ac o|baỽb o|e
wyr. a|thranoeth duỽ sul oed yr vnuet dyd ar pymthec
o galan racuyr drỽy hyrrỽyd awel wynt y dyblygaỽd
y logeu y|tir jwerdon. ac yno y|trigyaỽd ef y gayaf hỽnỽ
heb wneuthur argywed y|wyr iwerdon. Y vlỽydyn rac·ỽẏ+
neb y|bu diruaỽr varwolaeth ar y|ỻu a oed y·gyt a|r|brenhin
yn jwerdon o achaỽs newydder y|diar·greuedigyon wynoed
ac o|achaỽs kyfygdỽr o|newyn am na aỻei y|ỻogeu a|newi+
dyeu yndunt vordỽyaỽ attunt y gayaf drỽy dymhestlaỽl
gyndared mor jwerdon. Y|vlỽydyn hono y bu varỽ catwa+
ladyr ap gruffud ap kynan vis maỽrth. ac yn|y vlỽydyn hono
yd ymhoelaỽd brenhin ỻoegyr o|jwerdon. Gan adaỽ yno
varỽneit a marchogẏon vrdolyon drostaỽ o achaỽs y ken+
adeu a dathoed attaỽ y gan y pab a lowis vrenhin freinc
a|duỽ gỽener y croglith y doeth hyt y|mhenvro. ac yno
y|trigyaỽd y pasc hỽnỽ. a|duỽ ỻun pasc yd ymdidanaỽd
a rys yn thalacharn ar y|ford ac odyno yd aeth y loegyr
a gỽedy mynet y brenhin o gaer dyf hyt y casteỻ newyd
ar ỽysc anuon a|wnaeth y erchi y joruerth ap ywein dy+
vot y ymwelet ac ef ac y ymdidan am hedỽch a rodi ka+
darn gygreir a oruc idaỽ ac o|e veibon a|phan yttoed ywein
ap. joruerth. gỽas jeuanc grymus hegar yn ymparatoi o gyg+
or y|tat a|e wyrda y vynet y·gyt a|e|tat y lys y brenhin
| « p 180v | p 181v » |