LlGC Llsgr. Peniarth 11 – tudalen 24r
Ystoriau Saint Greal
24r
a|phregethu idaỽ a|dangos drỽy ystyryeu a|chwedleu tec o|r
euengylyeu yd oed da idaỽ gyffessu. a|e kynghores yn oreu
ac y|gaỻei. Os tydi heb·y gỽalchmei a|uynn menegi ymi
ryỽ beth a|dywetpỽyt ỽrthyf. Minnheu a|uanagaf ytti vy
hoỻ gyflỽr. kanys mi a|ỽnn dy|uot yn offeiryat. Ac yna
gỽalchmei a|edrychaỽd ar y meudwy. ac a|dywaỽt idaỽ y
hoỻ bechodeu. a|r hynn mwyhaf a|wydyat arnaỽ heb gelu
dim. a|pha|delỽ y daroed y|r manach o|r uanachlaỽc y alỽ
yn varchaỽc drỽc ffals. A|gỽedy daruot y walchmei kyf+
fessu ef a|adnabu y meudwy arnaỽ. na buassei yng|kyffes
yr ys|pedeir blyned ar|dec. Yna meudỽy a|dywaỽt. kyfyaỽn
heb ef y|th elwit ti yn varchaỽc urdaỽl drỽc anghywir. ka+
nys pan y|th|wnaethpỽyt ti yn varchaỽc urdaỽl. ny roet
yr urdas hỽnnỽ ytti yr gwassanaethu y gwas drỽc. namyn
yr gỽassanaethu yn|arglwyd ni iessu grist. ac yr amdif+
fyn yr|eglỽys. ac yr talu y duỽ y drysor a|roes ytt. nyt am+
gen no|r eneit. o|r|achaỽs hỽnnỽ|y|roet ytti urdas marcha+
ỽc urdaỽl. a|thitheu a|e haedyeist yn|drỽc Jaỽn. kanys o
gỽbyl ti a|vuost yn|gỽassanaethu y|kythreul. ac a ymedeỽ+
eist a|th|greaỽdyr. ac a|dugost y vuched waethaf. ac ef a|th
atwaenat yn|da y neb a|th|elwis yn varchaỽc urdaỽl drỽc
anghywir. ac yn|ỻe gỽir heb ef pany bei dy|vot ti yn bech+
adur ual yr|oedut ny ladyssit y seith mroder o|th achaỽs di
nac yr dy gymorth. Namyn ỽynt a|wnathoedynt eu pe+
nyt dros eu|drycweithredoed agatvyd. ac a|wnathoedynt
eu hedỽch y·ryngthunt a|duỽ. ac ny ladaỽd galaath ỽyntỽy
| « p 23v | p 24v » |