LlGC Llsgr. Peniarth 11 – tudalen 40r
Ystoriau Saint Greal
40r
hynny. ef a ymchoelaỽd o|e fford drachevyn. Pan weles peredur
y damwein yn mynet ueỻy ef a vu gyn|dristet ac na wydyat
beth a|dywedei. A|gỽedy hynny ef a dywaỽt ỽrth y marchaỽc
a|oed yn mynet ymeith. A ffaelyedic o gaỻon. kachyat o
gorff ymchoel drachevyn y ymlad a mi ar draet. A|r mar+
chaỽc a|aeth y|r fforest heb vynnv dim y ỽrthaỽ ef mỽy.
A|phan weles ynteu hynny ymovidiaỽ a|wnaeth a|e alỽ e
hun yn druan kanys ffaelassei ar y damunet. ac ueỻy y
bu ef yn hyt y|dyd heb welet neb yn|y byt o|r a|wnelei idaỽ
chweith didanỽch. A gỽedy dyuot nos arnaỽ yr yttoed yn
gyn vlinet ac na aỻei dim. yna ef a|disgynnaỽd kysgu
arnaỽ. ac ny deffroes ef yny vu hanner nos. a|phan
deffroes ef a|welei geyr y vronn gỽreic dec. yr|honn a|dywa+
ỽt ỽrthaỽ yn|dechrynedic. peredur heb hi. beth a|wney di ym+
ma. Nyt yttỽyf i heb ynteu yn gỽneuthur yma na drỽc
na da. eissyoes peituei ymi varch. ny bydỽn i yma hae+
ach o enkyt. Pei rout ti dy gret ymi heb hi ar wneuthur
yr hynn a archỽn i ytti pan y|th rybudyỽn. mi a barỽn
ytt yr aỽr honn varch da a|th|ygei* di y bop ỻe o|r y|myn+
nut. Pan gigleu ynteu hynny kyn|laỽenet vu ac nat ym+
lycaaỽd a|phỽy yr oed yn ymdidan. kanys yd oed ef yn teby+
gu y vot yn ymdidan a|gỽreic. ac eissyoes y kythreul yttoed
ef yn keissyaỽ som arnaỽ. a chyfyrgoỻedigaeth ar y|eneit.
Ac yna peredur a|gynnigyaỽd bot yn baraỽt y|wneuthur
yr hynn a vynnei hi pan y rybudyei. a hitheu a|gymerth
y gret ef ar hynny. a|hi a dywaỽt yna arho di vyvi yma
ychydic.
| « p 39v | p 40v » |