Rhydychen, Llsgr. Coleg yr Iesu 57 – tudalen 207
Llyfr Blegywryd
207
na thrỽy wat na thrỽy dyston. kanys mỽy yỽ
tystolyaeth kyhoed no gỽat kyfrif. Kyfreith
bonclust a|rodho dyn y araỻ trỽy ynni. cam*
yỽ talu pedeir ar|hugeint gyt a|e sarhaet y|r
dyn Ny dyly daỻ damdỽng. kany dylyir dam+
dỽng yn apsen golỽc da a|vo ar garn. ac na
wyl ynteu y da a|damdyngo. Kynny dylyo daỻ
damdỽng. ef a|dyly yrru. ac yn ol y yrr ef. reith
a|vyd. Gỽerth ewin dyn dec ar|hugeint. Gỽerth
y kỽgyn eithyaf. dec ar|hugeint. a|dimei. a
thraean dimei. Gỽerth y kỽgyn perued. dec ar
hugeint. a dimei. a deu·parth dimei. Gỽerth
y kỽgyn nessaf pedwar ugeint. keinyaỽc
yỽ gỽerth pob bleỽyn o amrant dyn. o|r tyrr
dim o|r croen. neu o|r kic. neu o|r asgỽrn. Gỽerth
creith ogyuarch a|dal a|e torro. A|oes un ỻe y
barner oet am ledrat yn ỻaỽ. heb daly vn o|dri
ardelỽ kyfreithaỽl. Oes. Gỽreic veichaỽc yny
dalyo y hardelỽ o·honei. o|hynny ef a|dylyir
rodi oet idi. o hynny hyt amser engi. A|oes
vn wreic y|dylyo y that talu ebediỽ. ac ny
| « p 206 | p 208 » |