Rhydychen, Llsgr. Coleg yr Iesu 57 – tudalen 6
Llyfr Blegywryd
6
Gỽrththrychyat. nyt amgen yr etling. Yr hỽnn
a|dylyo gỽledychu gỽedy ef. a|dylyir y anryde+
du ymlaen paỽp yn|y ỻys dieithyr y brenhin
a|r vrenhines. a hỽnnỽ a vyd mab neu vraỽt
y|r brenhin. Y le a vyd yn|y neuad am y tan a|r
brenhin. ac yn nessaf idaỽ y braỽdỽr y·ryng+
thaỽ a|r golovyn. ac yn eil nessaf idaỽ. yr offeiry+
at teulu. ac o|r parth araỻ y|r etlig penkerd y
wlat. Gỽedy hỽnnỽ nyt oes le dilis y neb o|r
parth hỽnnỽ. Gỽerth yr etlig yỽ. kyffelyb y
werth y brenhin. dyeithyr y dryded rann yn
eisseu. Gỽerth pob un. o|r etiuedyon ereiỻ a|ber+
thynont ỽrth y deyrnas yỽ. traean gỽerth y
brenhin. ac ueỻy gỽerth sarhaet pob vn o·ho+
nunt heb eur a heb aryant. Y brenhin bieu
rodi y|r etlig y hoỻ dreul. a|e hoỻ gyfreideu yn
anrydedus. Y letty yỽ. neuad y brenhin. ac y+
gyt ac ef y bydant y mackỽyeit. a|r kynnudỽr
a|dyly kynneu tan idaỽ. a|chaeu y drysseu
gỽedy yd|el yr etlig y gysgu yn diogel. an·kỽyn
| « p 5 | p 7 » |