Rhydychen, Llsgr. Coleg yr Iesu 57 – tudalen 95
Llyfr Blegywryd
95
drostaỽ a|throstunt ỽynteu yn|y ỻys. y braỽdỽr
ac ỽynteu y·gyt a|dalant werth y dauaỽt ef
yn gyffredin. kymein bop un a|e gilyd. kanys
o gyffredin gytsynnwyr a|chyttuundeb y rodas+
sant y vraỽt. ac ueỻy kyffredin dalu a|dylyant
ỽy dros eu braỽt. ac ueỻy os braỽdỽr o|vre ̷+
int tir a|gyỻ camlỽrỽ o achaỽs braỽt a roder.
veỻy pob un o gyffelyb yn|yr vn·ryỽ vraỽt a
gyỻ y gymeint. Ny dygỽyd neb yng|gỽerth
y dauaỽt. onyt y braỽdỽr e|hun. neu y neb
a ymwystlo ac ef pan rodont eu deu wystyl
erbyn yn erbyn yn ỻaỽ y brenhin am y|vraỽt
nyt amgen gỽystyl a gỽrthỽystyl.
P an|dygỽydo braỽdỽr sỽydaỽc ỻys
neu gymỽt neu gantref yng|gỽerth
y dauaỽt. tri pheth a|gyỻ ef yna. kyntaf
y kyỻ y sỽyd. Eil yỽ. breint brawdỽr o eisseu
sỽyd. Trydyd yỽ. gỽerth y dauaỽt. Pỽy|byn+
nac a|vo braỽdỽr o vreint tir. kyt dygỽydo
ef yng|gỽerth y dauaỽt trỽy y gam·vraỽt
| « p 94 | p 96 » |