LlGC Llsgr. Llanstephan 27 (Llyfr Coch Talgarth) – tudalen 21v

ac yn gyn|hawdet udunt wneuthur hynny a|phob peth. ac yr

aỽr·honn. ac nac am·heuet neb gaỻu o|r|seint a|r|engylyon hyn+

ny. a|r seint a|vydant yna gyffelyb y|r engylyon. a|ỻyna y|ryỽ

gedernit yỽ vn y seint. discipulus O rydit y seint. Magister Rydit cesar aỽ+

gustus a|vydei geithiwet ganthunt ỽy. kanys ef a|aỻwyt da  ̷+

ly hỽnnỽ a|e rỽymaỽ a|e gloffi. kymeint yỽ eu rydit ỽy ac y

gaỻant uynet drỽy bop peth. ac nat oes greadur a aỻo eu hat+

tal. megys na aỻaỽd y bed attal corff yr arglỽyd hyt na chyvot+

tei y vyny. ac na aỻỽyt y ludyas y myỽn a|r drysseu yn gaeat.

a|chynhebic vydant ỽynteu idaỽ ef. a ỻyna rydit y seint. discipulus

O ewyỻys y seint. Magister Drythyỻỽch selyf a|vydei drueni yno

ganthunt ỽy. discipulus Owi o|r ewyỻys a|gaffant ỽy pan vo duỽ ffyn+

naỽn yr hoỻ daoed yn peri udunt eu gwaly. Magister Deu wyn+

vydedigrỽyd yssyd. vn yssyd lei ym paradwys. ac araỻ ys+

syd vỽy yn teyrnas nef. a|chany phrovassam ni yr vn ohonunt

ỽy etto. ny aỻỽn ni gyffelybrỽyd amdanunt ỽy. namyn deu

ryỽ drueni yssyd. vn yssyd lei yn|y byt hỽnn. ac araỻ yssyd

vỽy yn uffern. a|chanys peunyd y pofỽn* ni y|neiỻ onadunt.

ni a|wdam rodi kyffelybrỽyd am yr honn a|brofet. megys

pei|dottit haearn taỻyt* gỽynnyas ar|benn dyn. ac yna y

deuei dolur trỽy bob aelaỽt idaỽ. veỻy yng|gỽrthỽyneb y

hynny y kaffant ỽy eu ỻỽyr ewyỻys ym|pob aelaỽt udunt.

o|vyỽn ac odieithyr. Ewyỻys dyn yma|yỽ gỽelet ỻawer o|wyr

a gỽraged tec. ac edrych ar adeilyadeu rac·eglur a gỽisgoed

maỽrweirthyaỽc. gỽarandaỽ keinyadaeth velys. ac yma+

drodyon|kysson. a thelyneu. a saỽtringeu. a phibeu. a|cher+

deu ereiỻ ac arogleu ystor. a|ỻysseuoed ac amryuael ireidyeu