LlGC Llsgr. 3035 (Mostyn 116) – tudalen 156v
Brut y Tywysogion
156v
dassant. a rei a gilassant at vchtrut a diag·hasant. a|r rei a
giỻỽys y ystrat tywi. Meredud vab ryderch a|e haruoỻes
yn hegar. kadỽgaỽn ac ywein a|ffoassant y log a oed yn
a·ber dyfi. a|dathoed o jwerdon echydic kyn|no hyny a|chyf+
newit yndi. Ac yna y deuth Madaỽc a|e vraỽt yn erbyn
vchtrut hyt yn ryt coruuec ac yno pebyỻaỽ a orugant
ac yn|y diwed y|doeth vchtrut yna a gỽedy y|dyuot ymgynullaw
hỽy kerdet hyt nos a|diffeithaỽ y gỽladoed yny vei dyd
.ac yna y dywaỽt vchtrut o|reig|bod ychwi nyt reit hyny
kany dylyir tremygu kadỽgaỽn ac ywein. kanys gỽyr+
da grymus ynt a deỽron. a medylyaỽ ỻawer y|maent
a·gatuyd y|mae porth udunt hyt na|s gỽdam ni. ac ỽrth
hynny ny weda yni dyfot yn dissyfyt am eu pen namyn
yn eglur dyd gyt ac vrdassaỽl gyweirdeb nifer. ac o|r
geireu hyny pop echydic yd hedychỽyt ỽynt val y|gaỻei
dynyon y|wlat dianc. a|thranoeth yd aethant y|r wlat a
gỽedy y gỽelet yn diffeith ym·gerydu e|hunein a|wnaeth+
ant. a dywedut ỻyma wenyeith vchtrut. a chuhudaỽ
vchdrut a|wnaethant a dywedi y neb ym·gytymdithaỽ
a|e ystryỽ ef. a gỽedy gỽibiaỽ ym pop ỻe yn|y wlat ny
chaỽssant dim namyn gre y kadỽgaỽn. a gỽedy cael
hono. ỻosgi y|tei a|r yscuboryeu a|r ydeu. ac ymchoelut
a|orugant y eu pebyỻeu drachefyn a|diua rei o|r dynyon
a foassynt y lan badarn. a gadel ereiỻ heb eu diua. a|phann
oedyn veỻy clybot a|wnaethant bot rei yn trigyaỽ
yn nodua dewi yn ỻan dewi vreui yn yr eglỽys gyt
a|r offeireit. anuon a wnaethant yno drycysprydolyon
kẏweithas a ỻygru a|wnaethant yr eglỽys a|e diffeithaw
o|gỽbyl
| « p 156r | p 157r » |