LlGC Llsgr. 3035 (Mostyn 116) – tudalen 193r
Brut y Tywysogion
193r
kygreir seith mlyned a oruc a brenhin freinc ac ymhoelut
y loeger a|thalu ỻawer o|e choỻedeu y|r eglỽysswyr ac yna
y bu gyffredin eỻygdaỽt y|r|eglỽysseu ar hyt ỻoeger a
chymry. Y|vlỽẏdẏn hono y bu varỽ geffrei escob myniỽ.
Y vlỽydyn rac·ỽyneb y bu teruysc rỽg jeuan vrenhin
a saesson y gogled a|ỻawer o jerỻ ereiỻ a barỽneit ỻoegyr
o achaỽs na|chatwei jeuan vrenhin ac ỽynt yr hen gyfreith
a deuodeu da a gaỽssynt gan etwart a henri y brenhin+
ed kyntaf ac a|tẏgassei ynteu y|r teyrnas pan rydhaaỽd
rodi vdunt y|kyfreitheu hẏnẏ a|r teruysc hỽnỽ a gerdaỽd
yn gymeint ac yd|ymaruoỻes hoỻ wyrda ỻoegẏr a hoỻ
tywyssogyon kẏmrẏ y·gyt y gyt* yn erbẏn y brenhin hẏt
na mynei neb onadunt heb y|gilid y gan ẏ brenhin na he+
dỽch na|chyfundeb na|chygreir yny talei ef y|r yglỽysseu y
kyfreitheu a|e|teilygdodeu a|dugassei ef a|e ryeni kyno hyny
y gantunt ac yn·y dalei hefẏt y|wyrda ỻoegyr a|chym·ry
y tired a|r kestyỻ a gymerassei ỽrth y ewyỻus y gantunt
heb na gỽir na|chyfreith a gỽedy y|dyscu o|r archescob keint
ac esgyb ỻoegyr a|e jerrỻ a|e barỽneit a gofyn idaỽ a rodei
yr|hen gyfreitheu da y|r teyrnas y gomed a|oruc a|herwyd
y|dywespỽyt rac y hofẏn ỽynt kymrẏt croes a oruc. ac
val kynt y kyfodes y gogledwyr yn|y erbyn o|r neiỻtu.
a|r kymry o|r tu araỻ ac yn|y vrỽydyr gyntaf y|gogled+
wyr y arnaỽ dinas ỻundein ac yna y kyrchaỽd ỻewelyn
ap joruerth a|r kymry y amỽythic a heb ỽrthỽynebed y rodet
idaỽ y dref a|r casteỻ. ac yna yd anuones gilis o breỽys
mab y|wilim breỽys robert y vraỽt y vrecheinaỽc a|e
gymryt yn anrydedus a|wnaeth gỽyrda brecheini
| « p 192v | p 193v » |