LlGC Llsgr. 3035 (Mostyn 116) – tudalen 95v
Brut y Brenhinoedd
95v
hyt pan vei drỽy lewenyd ac enrydet y kyweirynt y|mein hyny
yg|kylch y vedraỽt y|gỽyr enrydedus hẏnẏ Ac ỽrth hẏnẏ yn
herwyd y|wys a ossodes y brenhin y deuthant yr archescyb a|r
escyb a|r abadeu a|r athraỽon a|r yscolheigon a|hyny o|pop
vrdas amrafael o|r a oed y·dan y lywodraeth ef. A gỽedy ym+
gynuỻ paỽb ygyt y|r vn ỻe hỽnỽ pan deuth y dyd gossodedic
hỽnnỽ. Emrys wledic a wiscỽys coron y|teyrnas am y ben.
Ac yn vrenhinaỽl yd en·rydedaỽd gỽylua y|sulgỽyn drỽy
yspeit teir nos a|thri·dieu Ac yn hyny o yspeit ac amser yr
enryded a|theilygdaỽt. ac a oedynt yn wac heb perchenogy+
on na dylyedogyon arnadunt. Y|rei hyny a|rodes y brenhin
o|e wassanaethwyr ynteu ac o|e wyrda y dalu eu ỻafur
a|e gỽassanaeth vdunt. A|dỽy archescobaỽt a oedynt yn|wac
heb vugelyd vdunt nyt amgen kaer efraỽc a chaer ỻion ar
ỽysc Ac o gyffredin gygor y|gossodes ef sampsỽn yn archescob
yg|kaer efraỽc. gỽr arderchaỽc y grefyd a|e vuched oed hỽnỽ
Ac yg|kaer ỻion y|gossodes dyfric yn archescob y gỽr a|rac+
welas duỽwaỽl weledigaeth y vot yn etholedic y|r ỻe hỽnỽ
A gỽedy daruot idaỽ ỻunyaethu hyny a ỻawer o betheu
ereiỻ a berthynynt ar lywodraeth y|teyrnas. ef a orchymyn+
aỽd y vyrdin gossot y mein a ducsit o jwerdon yg|kylch y
vedraỽt ar y|wed y gỽelei ef y vot yn iaỽn A Myrdin yna
o arch y brenhin a|e gossodes yno yn yr ansaỽd yd oedynt
y|mynyd kilara yn jwerdon. ~ ~
A c yn yr amser hỽnỽ pascen vab gỽrtheyrn y gỽr a ffoasei
y·gyt a|r|saesson hyt yn germani a gyffroes y bobyl hono
a|e hoỻ varchogyon aruaỽc yn erbyn emrys wledic
y geissaỽ dial y dat arnaỽ gan adaỽ vdunt anheruynedic
amylder o eur ac aryant Os drỽy eu nerth ỽynt ac eu
kanhorthỽy y|gaỻei ynteu gỽerescyn teyrnas ynys. Prydein.
| « p 95r | p 96r » |